कैलाली । स्वास्थ्य सेवा गुणस्तरीय, सुरक्षित र प्रभावकारी बनाउन कैलालीमा निजी स्वास्थ्य संस्थाहरूको नियमित अनुगमनलाई तीव्रता दिइएको छ।
स्वास्थ्य कार्यालय कैलालीको नेतृत्वमा भइरहेको अनुगमनका क्रममा निजी स्वास्थ्य संस्थाहरूको दर्ता तथा नवीकरणको अवस्था, आवश्यक जनशक्ति, औषधि व्यवस्थापन, स्वास्थ्य उपकरण, सरसफाइ तथा संक्रमण नियन्त्रण, अभिलेख व्यवस्थापन र स्वास्थ्य सेवाको गुणस्तरलगायतका विषयमा निरीक्षण भइरहेको स्वास्थ्य कार्यालय कैलालीका निजी स्वास्थ्य संस्था अनुगमन संयोजक सूर्य बिष्टले निशाना न्युजलाई जानकारी दिए ।

अनुगमनका क्रममा स्वास्थ्य संस्थाले प्रचलित मापदण्डअनुसार सेवा प्रदान गरे–नगरेको, आवश्यक स्वास्थ्य उपकरण तथा जनशक्ति उपलब्ध भए–नभएको र औषधिको उचित व्यवस्थापन भए–नभएको विषयमा समेत निगरानी गर्ने गरेको उनले बताए ।

स्वास्थ्य सेवामा गुणस्तर, पारदर्शिता र जवाफदेहिता कायम गर्दै नागरिकलाई सुरक्षित तथा सहज स्वास्थ्य सेवा उपलब्ध गराउनु सबैको साझा जिम्मेवारी रहेको उनको भनाइ छ।