धनगढी । सुदूरपश्चिम प्रदेशका प्रमुख प्रहरी नायब महानिरीक्षक (डीआईजी) सानुराम भट्टराईले नेपाल प्रहरी राजमार्ग सुरक्षा तथा ट्राफिक व्यवस्थापन कार्यालय अत्तरियाको स्थलगत निरीक्षण गरेका छन्।
निरीक्षणका क्रममा डीआईजी भट्टराईले कार्यालयका विभिन्न शाखा, शाखागत अभिलेख तथा कार्यालय भवनको निरीक्षण गर्नुका साथै कार्यालयबाट सम्पादित कार्यहरूको अवस्थाबारे जानकारी लिएका थिए।
उनले ट्राफिक प्रहरीको कार्यसम्पादनलाई नागरिकमैत्री, प्रविधिमैत्री तथा सेवामुखी बनाउन निर्देशन दिए। ट्राफिक नियम तथा कानुनको प्रभावकारी कार्यान्वयन गर्दै नागरिकलाई सहज र सुरक्षित यातायात सेवा उपलब्ध गराउन उनले जोड दिएका छन्।
त्यस्तै, सडक दुर्घटना न्यूनीकरणलाई प्राथमिकतामा राख्दै नयाँ प्रविधिको प्रयोग र प्रभावकारी ट्राफिक व्यवस्थापनमा विशेष ध्यान दिन उनले निर्देशन दिएका छन्। नागरिकको सुरक्षा तथा सहज आवागमनलाई केन्द्रमा राखेर जिम्मेवारी निर्वाह गर्नसमेत उनले ट्राफिक प्रहरीलाई आग्रह गरेका छन्।