धनगढी । कैलाली र कञ्चनपुरका विभिन्न स्थानबाट प्रहरीले भन्सार छली गरी भारतबाट ल्याइएका ६ लाखभन्दा बढी मूल्यका  सामान बरामद गरेको छ।
कैलालीका विभिन्न स्थानबाट शनिबार जिल्ला प्रहरी कार्यालय कैलाली तथा मातहतका कार्यालयबाट खटिएको प्रहरी टोलीले भारतबाट भन्सार छली गरी ल्याइएका बिडी, सुर्ती, विभिन्न किसिमका कपडा तथा किराना सामान बरामद गरेको हो। बेवारिसे अवस्थामा फेला पारिएका ती सामानको अनुमानित मूल्य ५ लाख ९३ हजार ७३० रुपैयाँ रहेको प्रहरीले जनाएको छ।
त्यस्तै, कञ्चनपुरको बेलौरी नगरपालिका–६ वैशाखाबाट पनि प्रहरीले भन्सार छली गरी ल्याइएका बिडी, सुर्ती, कपडा तथा किराना सामान बरामद गरेको छ। इलाका प्रहरी कार्यालय बेलौरीबाट खटिएको प्रहरी टोलीले बेवारिसे अवस्थामा फेला पारेका उक्त सामानको अनुमानित मूल्य ६९ हजार १०० रुपैयाँ रहेको छ।
दुवै जिल्लाबाट बरामद गरिएका सामान आवश्यक प्रक्रिया पूरा गरी प्रहरीले नियन्त्रणमा लिएको जनाएको छ। दुवै घटनामा बरामद सामानको कुल अनुमानित मूल्य ६ लाख ६२ हजार ८३० रुपैयाँ रहेको छ।