धनगढी । कैलालीमा भारी वर्षा तथा मौसम प्रतिकूल हुने सम्भावना देखिएपछि धनगढी उपमहानगरपालिकाले नदी तटीय तथा जोखिमयुक्त क्षेत्रमा बसोबास गर्ने नागरिकलाई उच्च सतर्कता अपनाउन आग्रह गरेको छ।
जिल्ला प्रशासन कार्यालय, कैलालीबाट प्राप्त पत्रका आधारमा धनगढी उपमहानगरपालिकाको विपद् व्यवस्थापन शाखाले शुक्रबार सूचना जारी गर्दै भारी वर्षा तथा प्रतिकूल मौसमका कारण बाढी, पहिरो, डुबानलगायतका विपद् हुनसक्ने भन्दै नागरिकलाई सावधानी अपनाउन अनुरोध गरेको हो।
उपमहानगरपालिकाले विशेषगरी नदी तटीय क्षेत्र तथा जोखिमयुक्त क्षेत्रमा बसोबास गर्ने सम्पूर्ण नगरवासीलाई उच्च सतर्कता अपनाउँदै सुरक्षित रहन आग्रह गरेको छ।
सम्भावित विपद्का कारण जनधनको क्षति हुनसक्ने भएकाले वर्षाका बेला नदी तथा खोलाको आसपास नजान, जोखिमयुक्त स्थानमा सावधानी अपनाउन तथा आवश्यक परे सुरक्षित स्थानतर्फ जान उपमहानगरपालिकाले आग्रह गरेको छ।
विपद् व्यवस्थापन शाखाका अनुसार मौसमको अवस्था हेरेर नागरिकले आवश्यक पूर्वतयारी र सावधानी अपनाउनुपर्नेमा जोड दिइएको छ।