कैलाली । नेपाली कांग्रेस सुदूरपश्चिम संसदीय दलका नेता तथा निवर्तमान मुख्यमन्त्री कमलबहादुर शाहले गगन थापा सिंगो नेपाली कांग्रेसको पार्टी सभापति बन्न नसक्नु दुर्भाग्य भएको बताएका छ्न ।
बिहीबार लम्कीचुहा नगरपालिकाको नगर अधिवेशनलाई सम्बोधन गर्दै उनले सो कुरा बताएका हुन । निवर्तमान मुख्यमन्त्री शाहले कांग्रेसको संवैधानिक तथा वैधानिक अवधि बाँकी रहँदारहँदै पनि सबैलाई समेटेर एकताको महाधिवेशन गर्ने वातावरण निर्माण गर्न विशेष महाधिवेशन पक्षधर नलागेको आरोप लगाए ।
कार्यक्रममा निवर्तमान मुख्यमन्त्री शाहले प्रभाव पार्ने उद्देश्यले महाधिवेशन गर्न आतुर हुनेभन्दा पार्टीभित्रका सबै साथीलाई एकताबद्ध बनाएर अघि बढ्ने वातावरण निर्माण गर्नुपर्ने धारणा ब्यक्त गरे । कांग्रेसका सबै नेता–कार्यकर्तालाई भावनात्मक रूपमा समेत समेटेर एकताको महाधिवेशन गर्नु अहिलेको आवश्यकता रहेको उनको भनाइ थियो।
कांग्रेस सभापति शेरबहादुर देउवाले आफू अब पार्टी नेतृत्वमा नरहने घोषणा गरिसकेको र पार्टी विधानले समेत सभापतिको दुई कार्यकालको व्यवस्था गरेको उल्लेख गर्दै निवर्तमान मुख्यमन्त्री शाहले सबैलाई समेट्न सकेको भए नियमित महाधिवेशनबाट गगन थापा पार्टी सभापति बन्नसक्ने विश्वास व्यक्त गरे ।
उनले कांग्रेस कमजोर हुँदा मुलुक र संविधानसमेत कमजोर हुने भएकाले नेपाली कांग्रेस एकजुट हुनुको विकल्प नरहेको बताए । पार्टीभित्रको एकता, सहकार्य र भावनात्मक सम्बन्धलाई बलियो बनाएर अघि बढ्नुपर्नेमा उनले जोड दिए ।
नगर संयोजक कृष्णप्रसाद धमलाको सभापतित्वमा सम्पन्न नगर अधिवेशनले नयाँ नेतृत्व चयन गरेको छ। अधिवेशनबाट प्रयागराज खनालको नेतृत्वमा २७ सदस्यीय नगर कार्यसमिति चयन भएको छ।
