धनगढी । कैलालीको धनगढी उपमहानगरपालिका नगरप्रमुख गोपाल हमालले उपमहानगरमा प्रवेश गरेबापत कुनै शुल्क तिर्नु नपर्ने बताएका छन् । धनगढी प्रवेश गर्दा शुल्क तिर्नुपर्ने आशयको भिडियो सार्वजनिक भएपछि उनले त्यसप्रति आपत्ति जनाउँदै उपमहानगरपालिकाले प्रवेश शुल्क उठाउने अधिकार नराख्ने स्पष्ट पारेका हुन् ।
मेयर हमालले भिडियो सन्देशमार्फत धनगढी प्रवेश गर्ने नागरिकबाट शुल्क असुल्नु गैरकानुनी हुने बताएका छन्। उपमहानगरपालिकाको क्षेत्राधिकारभित्र प्रवेश शुल्क उठाउने व्यवस्था नरहेको उल्लेख गर्दै उनले कसैले त्यस्तो शुल्क लिएको पाइए तत्काल प्रहरीलाई जानकारी गराउनसमेत आग्रह गरेका छन् ।
उनले भनेका छन् ‘हामी आफ्नो क्षेत्राधिकारमा सचेत छौँ, हामीलाई प्रवेश शुल्क उठाउने अधिकार पनि छैन । त्यस्तो कसैले उठाएको छ भने प्रहरीलाई बुझाउन अनुरोध छ । हामीले त आएको मान्छेलाई स्वागत गर्ने हो, कर लिने होइन।’
धनगढी प्रवेश गर्दा शुल्क तिर्नुपर्ने भन्दै सार्वजनिक गरिएको भिडियोले सर्वसाधारणमा भ्रम सिर्जना गरेको उनको भनाइ छ। यस्ता गतिविधि जहाँसुकै भए पनि निरुत्साहित गर्नुपर्नेमा जोड दिँदै उनले जबर्जस्ती शुल्क उठाउने कार्य भए कानुनी प्रक्रियामा जानुपर्ने बताएका छन्।
आफ्नो नामसमेत उल्लेख गरेर विषय सार्वजनिक गरिएकोप्रति असन्तुष्टि जनाएका हमालले प्रवेश शुल्क उठाउने व्यक्ति वा समूहबारे जानकारी भए उपमहानगरपालिका वा नगर प्रहरीलाई खबर गर्न आग्रह गरेका छन् ।
