धनगढी । डोटीको प्रसिद्ध धार्मिक स्थल बडिकेदारमा आगामी मंसिर ५, ६ र ७ गते ‘बडीकेदार धार्मिक पर्यटन मेला–२०८३’ आयोजना हुने भएको छ ।
बडीकेदार क्षेत्र पर्यटन विकास समितिले आज धनगढीमा पत्रकार सम्मेलनको आयोजना गर्दै मेलाका बारेमा जानकारी दिएको हो ।
मेला केवल पूजाआजा र दर्शनको कार्यक्रम मात्र नभई धार्मिक पर्यटन प्रवद्र्धन, स्थानीय संस्कृति संरक्षण, आर्थिक गतिविधि वृद्धि र नेपाल–भारतबीच धार्मिक तथा सांस्कृतिक सम्बन्ध विस्तार गर्ने महत्वपूर्ण अवसर हुने समितिका अध्यक्ष उपेन्द्र बमले बताए ।
उनले बडीकेदार केवल एउटा धार्मिक स्थल मात्र नभइ सुदूरपश्चिमको धार्मिक आस्था, सांस्कृतिक पहिचान र पर्यटकीय सम्भावनाको महत्वपूर्ण धरोहर भएको बताए ।
सो क्षेत्रमा सडक,पदमार्ग, खानेपानी, धर्मशाला, सञ्चार र अन्य आवश्यक पूर्वाधार विकासमा प्रदेश सरकारको विशेष ध्यान र सहयोग आवश्यक रहेको उनले बताए ।
‘बडीकेदारलाई हामीले केवल मेला लाग्ने ठाउँका रूपमा होइन,राज्यले लगानी गर्नुपर्ने राष्ट्रिय धार्मिक पर्यटनको सम्भावनायुक्त गन्तव्यका रूपमा हेर्नुपर्छ’ उनले भने ‘सरकारको साथ र स्थानीय जनताको सहभागिता भयो भने बडीकेदार सुदूरपश्चिमको पर्यटन विकासको नयाँ पहिचान बन्न सक्छ ।’
त्यस्तै, पत्रकार सम्मेलनमा बोल्दै बडिकेदार क्षेत्र पर्यटन विकास समितिका कार्यकारी अधिकृत गणेशराज जोशीले डोटी जिल्लाको करिब २ हजार ८९१ मिटर उचाइमा अवस्थित बडिकेदार धाम प्रसिद्ध धार्मिक तथा पर्यटकीय शक्तिपीठ भएको बताए ।
उनले भगवान् शिवको वासस्थान मानिने यस धाममा ठूलो पवित्र शिलालाई शिवलिङ्गका रूपमा पूजा गर्ने धार्मिक परम्परा रहेको बताउँदै पौराणिक किंवदन्तीअनुसार गाईले स्वतः शिलामा दूध चढाउने गरेको विश्वासपछि यस क्षेत्रमा पूजाआजा सुरु भएको किम्बदन्ती रहेको बताए ।
उनले भने ‘बडिकेदार धाममा श्रद्धापूर्वक पूजा गरे मनोकामना पूरा हुने जनविश्वास छ । विशेषगरी सन्तान प्राप्तिको कामना गर्दै भक्तजन यहाँ पुग्ने गर्छन् ।’
‘प्रत्येक वर्ष कार्तिक शुक्ल त्रयोदशीको राति मेला लाग्ने र चतुर्दशीका दिन बिहान पवित्र शिलाको विशेष पूजाआजा गर्ने परम्परा छ ’उनले भने ‘मेलामा कैलाली, कञ्चनपुर, डोटीलगायत भारतको उत्तर प्रदेशबाट समेत हजारौँ श्रद्धालु भक्तजन आउने गर्छन् ।’
पत्रकार सम्मेलनमा बोल्दै डोटीको बोगटान फुडसिल गाउँपालिकाका अध्यक्ष कमल गडसिलाले बडिकेदार धार्मिक तथा सांसकृति क्षेत्र भएको बताउँदै यसको विकासका लागि पालिकाले सक्दो सहयोग गर्दै आएको बताए ।
पत्रकार सम्मेलनमा बोल्दै सुदूरपश्चिम प्रदेशका मुख्यमन्त्री खगराज भट्टले बडिकेदार धार्मिक पर्यटकीय हिसाबले महत्वपूर्ण क्षेत्र भएको बताउँदै यसको प्रबद्र्धन गर्न प्रदेश सरकार प्रतिवद्ध रहेको बताए ।
उनले भने ‘बडिकेदार महत्वपूर्ण धार्मिक स्थल हो । पवित्र तीर्थस्थल हो । यसको सर्वाङ्गिण विकासका लागि प्रदेश सरकार प्रतिवद्ध छ ।’



























