काठमाडौं– दक्षिण कोरिया कतारमा जारी फिफा विश्वकप फुटबलको नकआउट चरणमा प्रवेश गरेको छ । एजुकेसन सिटी स्टेडियममा शुक्रबार राति पोर्चुगललाई २–१ गोलले हराउँदै दक्षिण कोरिया नकआउट चरणमा पुगेको हो ।
इन्ज्युरी समयको पहिलो मिनेटमा गरेको गोलले नै दक्षिण कोरियालाई जित दिलायो । जनोब रंगशालामा भएको खेलमा उरुग्वेले घानालाई २–० ले पराजित गर्यो । जसले कोरियालाई विश्वकप २०२२ को नकआउट चरणमा पुर्यायो ।
अल जनोबमा खेल सकिएसँगै एजुकेसन सिटीमा कोरियन खेलाडीहरूले अँगालो हाल्दैमा खुसी मनाए । १२ वर्षपछि नकआउट चरणमा पुगेको खुसीयालीमा कोरियन खेलाडी झन्डै दस मिनेट मैदान घुम्दै समर्थक अगाडि पुगेर रमाएका थिए ।
सहआयोजक छँदा सन् २००२ मा स्पेन र इटालीलाई पनि पराजित गर्दै सनसनीपूर्ण रूपमा विश्वकपको सेमिफाइनल पुगेको दक्षिण कोरियाले दक्षिण अफ्रिका (२०१०) यता पहिलोपल्ट समूह चरण पार गरेको हो । ब्राजिल (२०१४) र रुस (२०१८) को संस्करणमा कोरिया समूह चरणबाटै बाहिरिएको थियो ।
उरुग्वेविरुद्ध गोलरहित खेलेपछि घानाविरुद्ध रोमाञ्चक खेल ३–२ ले हारेको कोरियाले यसअघि नै अन्तिम १६ को यात्रा पक्का गरिसकेको क्रिस्टियानो रोनाल्डोको टिम पोर्चुगलविरुद्ध समूहको अन्तिम खेल खेल्ने भएपछि कतारमा पनि उसको चुनौती चाँडै सकिने अनुमान गरिएको थियो ।
रिकार्डो होर्ताले विश्वकप डेब्युको पाँचौं मिनेटमै गोल गरेपछि पोर्चुगलले अग्रता लिएको थियो । किम योङ–ग्वोनले २७ औं मिनेटमा कोरियालाई बराबरीमा फर्काए । ब्रुनो फर्नान्डेजसहित केही स्टार खेलाडीलाई आराम दिएको पोर्चुगलले थुप्रै अवसर उपयोग गर्न सकेन । कोरियाले भने संघर्ष जारी राख्यो । र, ह्वाङको निर्णायक गोलमा २–१ को जित निकाल्दै नकआउटमा स्थान सुरक्षित गर्यो ।
ठीक उही समयमा भएको खेलमा घानालाई उरुग्वेविरुद्ध बराबरीले पनि अन्तिम १६ मा पुर्याउने थियो । कप्तान आन्द्रे आयेब पहिलो हाफमा पाएको पेनाल्टीमा चुकेपछि घानालाई गाह्रो भएको थियो । त्यसपछि गियोरगियन डी आरासकाएटाले २६ र ३२ औं मिनेटमा गोल गर्दै उरुग्वेलाई २–० को जित दिलाए । तर, सन् १९३० र १९५० को विश्वकप जितेको टिमलाई नकआउटमा पुर्याउन त्यो स्कोर पर्याप्त भएन । थप एक गोल गरेको भए समीकरणको पटकथा उरुग्वेकै पक्षमा कोरिने थियो ।
कोरिया नकआउटमा पुग्नुमा पोर्चुगलका स्टार क्रिस्टियानो रोनाल्डोको ठूलो हात छ। रोनाल्डोले गरेको एक गल्तीकै कारण कोरियाले कम्ब्याक गरेको हो। गए राति भएको खेलमा वास्तवमै कोरियाको जितमा क्रिष्टियानो रोनाल्डोको योगदान थियो। खेलको सुरुवातमै कोरिया १ गोलले पछि परेको थियो।
तर २७ अौं मिनेटमा दक्षिण कोरियाले बराबरी गोल फर्काउन सफल भयो । कर्नरमा क्लियर हुन नसकेको बललाई किम युङग्वनले गोलमा परिणत गरेका थिए। कर्नर बललाई रोनाल्डो क्लियर गर्नबाट चुकेका थिए।
१२ वर्षअघि लुइस स्वारेजले गोल नजिक पुगेको बल हातले रोकपछि पाएको पेनाल्टीमा असमोह जियान गोल गर्न चुकेका थिए, जसले घानालाई सेमिफाइनल पुग्ने पहिलो अफ्रिकी टिम बन्नबाट रोकेको थियो । यसपाली अन्तिम १६ प्रवेशको होडमा पनि घानाले उस्तै असफलता बेहोर्यो । सन् २०१० को विश्वकपको क्वाटरफाइनलमा उरुग्वेसँग हारेयता घानाको चुनौती समूह चरणमै समाप्त हुँदै आएको छ ।
कोरिया र उरुग्वेले ४–४ अंक बनाए । तर, धेरै गोल गरेको आधारमा कोरिया समूह एच उपविजेता भएर नकआउट चरणमा छनोट भएको हो । १२ वर्षअघि सेमिफाइनल पुगेको उरुग्वे त्यसयता पहिलोपल्ट समूह चरणबाटै बाहिरिएको हो।
