काठमाडौं- युवा तथा खेलकुदमन्त्री महेश्वर जङ्ग गहतराजले गरेको मन्त्रीस्तरीय निर्णयको पालना गर्दै राष्ट्रिय खेलकुद परिषद् (राखेप) ले नेपाल उसु महासंघलाई पुष ५ गते विघटन गरेको थियो ।

राखेपका उपाध्यक्ष शिव कोईराला (ज्वाला) को संयोजकत्वमा गठित विवाद समस्या समाधान समितिको सिफारिसमा कार्तिक २४ गते मन्त्रीस्तरीय निर्णय गर्दै तीन महिनाभित्र साधारणसभा तथा निर्वाचन गर्नेगरि नेपाल उसु महासंघको विघटन गरिएको हो ।

नेपाल उसु महासंघको विघटनसँगै राखेपले जनक बर्तौलाको अध्यक्षतामा २२ सदस्यीय तदर्थ समिति समेत गठन गरेको छ । नेपाल उसु महासंघको विधान अनुसार २२ सदस्यीय तदर्थ समिति गठन गर्न मिल्दैन, यस्तो गरे आफैमा गैरकानुनी र अवैधानिक ठहरिन्छ ।

नेपाल उसु महासंघको कार्यसमिति या तदर्थ समिति गठन गर्दा विजोेड अङ्कमा गरिने प्रावधान रहेको छ । जुन कुरा उसु महासंघको विधानमा प्रस्टरुपमा उल्लेख छ । यहि नियमको पालना गर्दै उसु महासंघले १७, १९, २१, र २९ जनासम्मको कार्यसमित बनाउदै आएको छ ।

साथै जनक वर्तौलाको अध्यक्षतामा गठन गरिएको र राखेप ६२२–०७९ मा दर्ता गरिएको राखेपको पत्रमा नेपाल उसु महासंघ विघटन गरेर तदर्थ समिति गठन गरेको मिति समेत उल्लेख गरिएको छैन् । उक्त पत्रमा राखेपको कुन पदाधिकारीले हस्ताक्षर गरेको हो त्यसको नाम समेत खुलाइएको छैन् । पत्रमा केवल हस्ताक्षर मात्रै देखिएको छ ।

त्यस्तै अर्को महत्वपूर्ण कुरा, नेपाल उसु महासंघको विधानमा उप–महासचिवको व्यवस्था छैन् । तर राखेपले गठन गरेको तदर्थ समितिमा भने उप–महासचिव राखेर विधानकै खिल्ली उडाउने कार्य भएको छ। हालै गठन गरिएको तदर्थ समितिमा राजीव महर्जनलाई उप–महासचिवको जिम्मेवारी दिइएको छ ।

यसरी हचुवाको भरमा खेलकुदमन्त्री गहतराज र राखेपका उपाध्यक्ष कोईरालाको विशेष जोडमा नेपाल उसु महासंघको विघटन गरिएको प्रस्टरुपमा देखिन्छ । राखेपका अध्यक्ष र उपाध्यक्षको मिलोमतोमा जनक बर्तौलालाई उसु महासंघको अध्यक्ष बनाउन यस्तो प्रपञ्च रचिएको बुझिन आएको छ ।

विना कारण, नियम कानुन विपरित व्यक्तिगत स्वार्थसिद्ध गर्नका लागि नेपाल उसु महासंघलाई विघटन गरिएपछि उसु खेलमा अन्तर्राष्ट्रिय प्रतिबन्ध लाग्ने प्रबल सम्भावना बढेर गएको छ । वर्तमान अवस्थामा नेपाल उसु महासंघ राष्ट्रिय खेलकुद विकास ऐन, २०७७, अन्तर्राष्ट्रिय उसु महासंघ र एशियन उसु महासंघको पूर्ण मान्यता अनुशार चल्दै आएको थियो ।

तर एक्कासी राखेपले मन्त्रीस्तरीय निर्णय भन्दै नेपाल उसु महासंघलाई विघटन गर्दै तदर्थ समित गठन गरेपछि अहिले विवाद उत्पन्न भएको छ । राखेपले नेपाल उसु महासंघलाई विघटन गरेपछि यसको नकरात्मक प्रभाव अन्तर्राष्ट्रियस्तर पर्ने देखिन्छ । जसले उसु खेललाई मात्र विवादमा नतानी खेलाडीहरुको भविष्यमा समेत अन्योलता उत्पन्न गराईदिएको छ ।

तसर्थ राखेपको यस्तो गैरजिम्मेवार र नियम विपरित कदमले यतिबेला उसु खेलको भविष्य नै धरापमा पर्ने संकेत देखिएको छ । व्यक्तिगत स्वार्थसिद्ध गर्न चालेको यो कदमले भोलि नेपालको उसु खेलमा अन्तर्राष्ट्रिय प्रतिबन्ध लाग्यो भने अन्यथा मानिने छैन ।

हालै गण्डकी प्रदेशमा सम्पन्न नवौं राष्ट्रिय खेलकुद प्रतियोगितामा बीरवहादुर तामाङ अध्यक्ष रहेको नेपाल उसु महासंघलाई राखेपले पत्राचार गर्दै उसु खेलको सञ्चालन गरेको थियो । उसु खेल सञ्चालन गर्न उपाध्यक्ष दधिराम सिटौलाको संयोजकत्वमा तीन सदस्य समिति गठन गरेको थियो । नवौं राष्ट्रियमा उसु खेलको उद्घाटन खुद राखेपका सदस्यसचिव टंकलाल घिसिङ्गले गरेका थिए । मेरो खेल