काठमाडौं- प्रधानमन्त्री कप थ्री नेशन्स फुटबल सुरु हुन एकदिन बाँकी रहँदा नेपाली राष्ट्रिय फुटबल टिमको घोषणा गरिएको छ। किरण चेम्जोङको कप्तानीमा मंगलबार घोषणा गरिएको २३ सदस्यीय टोलीमा ७ जना नयाँ अनुहारलाई पनि समेटिएको छ।

प्रतियोगिताअघि प्रिम्याच कन्फ्रेन्समा लाओस र नेपाल दुबैले राम्रो खेल्दै नतिजा आफ्नो पक्षमा पार्न प्रयास गर्ने बताए। प्रशिक्षक भिन्सेन्जो अल्बर्टोले पहिलो पटक राष्ट्रिय टिम सम्हाल्न लागेका छन्।

नेपालसहित भुटान र लाओसबीच हुने प्रतियोगिताको विजेताले ५ हजार डलर प्राप्त गर्ने छ। प्रतियोगिताका लागि भुटान र लाओसको टिम काठमाडौँ आइसकेको छ। नेपालसहित तीनै टोली एभरेष्ट होटलमा रहेका छन्। दशरथ रंगशालामा नेपाल र लाओसबीचको उद्घाटन खेल बुधबार साँझ ६ बजे सुरु हुने अखिल नेपाल फुटबल संघले जनाएको छ। प्रतियोगिताको लाइभ नेपाल टेलिभिजनबाट गरिने छ।

पहिलो पटक राष्ट्रिय टिममा बोलाइएका खेलाडीमा अभिषेक बराल, सनिश श्रेष्ठ, पदम भट्टराई, मणिकुमार लामा, सुमित श्रेष्ठ, नवीन लामा र दीपकराज सिंह ठकुरी रहेका छन्।

प्रतियोगिताको उद्घाटन खेलमा नेपालले बुधबार लाओसको सामना गर्दैछ। त्यसअघि आयोजित प्रि–म्याच प्रेस कन्फ्रेन्समा नेपाली टिमका कप्तान किरण चेम्जोङले छोटो तयारीका बाबजुत टिम लाओसविरुद्ध तयार रहेको बताए।

नयाँ प्रशिक्षक र नयाँ खेलाडीको कारण टोलीका लागि चुनौती भए पनि टिमले राम्रो नतिजा निकाल्ने विश्वास व्यक्त गरे।

नेपालले २०१६ पछि पहिलो पटक लाओससँग खेल्न लागेको हो। एएफसी सोलिडारिटी कपको सेमिफाइनलमा नेपाल र लाओसबीच प्रतिस्पर्धा भएको थियो। जसमा २–२ गोलको बराबरीपछि नेपालले पेनाल्टीमा ३–० ले खेल जितेको थियो।

लाओसका मुख्य प्रशिक्षक माइकल वेसले पनि आफूसँग युवा टोली रहेकाले राम्रो नतिजा आउने दाबी गरेका छन् ।

यस्तो छ नेपाली टिमः
गोलरक्षक– किरण चेम्जोङ, दीप कार्की, अभिषेक बराल
डिफेन्डर– रोहित चन्द, अनन्त तामाङ, आदित्य चौधरी, विकास खवास, सनिश श्रेष्ठ, निशान खड्का, पदम भट्टराई
मिडफिल्डर– मणि लामा, नविन लामा, पुजन उपरकोटी, एरिक विष्ट, कमल थापा, आशिष चौधरी, आयुष घलान र सुमित श्रेष्ठ
फरवार्ड– दीपकराज सिंह ठकुरी, मनिष डाँगी, नवयुग श्रेष्ठ, भरत खवास र अन्जन विष्ट