डोटी- नेपाली कांग्रेस डोटीको यहि असोज २४ गते सम्पन्न हुने महासमिति सदस्य निर्वाचनको तयारी पूरा भएको डोटी कांग्रेसले जानकारी दिएको छ । २४ गते हुने निर्वाचनको लागि आज मनोनयन दर्ता प्रक्रिया हुने निर्वाचन समितिले जानकारी दिएको छ ।
५ जना खुल्ला सदस्य, २ जना महिला खुल्ला सदस्य र ४ जना आरक्षण सदस्य गरी जम्मा ११ जना महासमिति सदस्यको लागि निर्वाचन भइरहेको नेपाली कांग्रेस डोटीका उपसभापति नारायण प्रसाद जोशीले जानकारी दिए ।
नेपाली कांग्रेस डोटीले महासमिति सदस्यहरु आन्तरिक रुपमा छनौट गर्न नसकेपछि निर्वाचनमा जानुपरेको बताइएको छ । निर्वाचन हुने भएपछि अहिले कांग्रेसका नेता तथा कार्यकर्ता सबै जिल्ला भित्रिएका छन् ।
यो संगै दिपायल, सिलगढीमा चहलपहल समेत बढेको छ । अधिकांश समय जिल्ला बाहिर बस्ने नेताहरू समेत अहिले जिल्ला भित्रिएका छन् ।
राजपुरस्थित सेती सभाहलमा हुने निर्वाचनमा जिल्लाभरीबाट जम्मा मतदाता संख्या करिब साढे ११ सय रहेका छ । जिल्ला कार्य समितिको निर्वाचनामा सहभागि भएका मतदाहरू सबै यो निर्वाचनमा पनि सहभागि हुने भएकाले कार्य समितिको निर्वाचनको झल्को दिइरहेको पाइन्छ ।
