काठमाडौँ- प्रधानमन्त्री पुष्पकमल दाहालले मंगलबार बझाङमा गएको भूकम्पबारे छलफल गर्नका लागि राष्ट्रिय विपद् जोखिम न्यूनिकरण तथा व्यवस्थापन प्राधिकरणको आकस्मिक बैठक बोलाएका छन् ।
प्रधानमन्त्री दाहालले बिहीबार बिहानका लागि प्राधिकरणको आकस्मिक बैठक बोलाएका हुन् । बझाङ केन्द्रबिन्दु बनाएर गएको भूकम्प, त्यसबाट भएको क्षति र सरकारको कार्ययोजनाबारे प्राधिकरणको बैठकका एजेन्डा पनि तय गरिएको छ ।
त्यस्तै, बैठकमा भूकम्पबाट भएको क्षति, राहत, पुनःर्स्थापना लगायतका विषयमा छलफल हुने प्रधानमन्त्रीको सचिवालयले जानकारी दिएको छ । बैठक बस्नुपूर्व बुधबार दिउँसो प्रधानमन्त्रीले बझाङ जिल्लाका जनप्रतिनिधि र राजनीतिक दलका नेताहरूसँग पनि भूकम्पको क्षति र त्यसपछिको वस्तुस्थितिबारे जानकारी लिएका थिए ।
