धनगढी- कैलालीमा डेंगु संक्रमितको संख्या ४८२ पुगेको छ । जिल्लामा दश महिनाको अवधिमा ४८२ जना डेंगी संक्रमणका बिरामी फेला परेको स्वास्थ्य कार्यालय कैलालीले जनाएको छ ।
तथ्यांक अनुसार अगष्टमा १६९ जना विरामी फेला परेकोमा सेप्टेम्बरमा थप २३४ विरामी थपिए । यो महिनाको १२ दिनमा ५३ जना विरामी थपिएका छन् ।
कैलालीमा डेङ्गुका बिरामी बढ्दै गएकाले रोकथामको अभियानलाई तीव्रता दिइएको स्वास्थ्य कार्यालय कैलालीले जनाइएको छ । डेङ्गु नियन्त्रणका लागि लार्भा खोजी र नष्ट अभियानलाई जेठबाटै सञ्चालन गरिए पनि केस बढ्दै जाँदा अभियान अझै अपुग देखिएको स्वास्थ्य कार्यालय कैलालीको महामारी रोग नियन्त्रण शाखा प्रमुख मीनबहादुर धामीले बताए ।
एडिस प्रजातिको पोथी लामखुट्टेको टोकाइबाट डेङ्गु रोग लाग्ने र प्रजातिको लामखुट्टेले दिउँसोमा मात्रै मानिसलाई टोक्ने उनले बताए । डेङ्गु रोग रोकथामका लागि डेङ्गु सार्ने लामखुट्टेको लार्भा खोज र नष्ट अभियान लाई तीव्रता दिइएको उनले बताए ।
यसका साथै, घर वरिपरि पानी जम्न नदिनुका साथै बट्टा, गमला, टायर, प्लाष्टिकको डब्बा, ड्रमलगायतमा जमेको पानी बेला–बेला फाल्नुपर्ने उनको भनाइ छ ।
डेङ्गुबाट जोगिनका लागि लामखुट्टेको वृत्ति विकास रोक्न आवश्यक रहेको उनले बताए । उनले महामारी बहुआयामिक समस्या रहेकाले डेङ्गुको महामारी रोक्न सबै आफ्नो ठाउँबाट लाग्न आवश्यक रहेको बताए ।
डेङ्गुको अझै एक महिना जोखिम रहेकाले सतर्क रहन जरुरी रहेको उनको सुझाव छ । गत वर्ष कैलालीमा ४५५ जनामा डेङ्गु सङ्क्रमण भएको थियो । जसमध्ये तीन जनाको ज्यान गएको थियो । त्यसअघि २०७६–७७ मा ४१, २०७७–७८ मा १०१ र २०७८–७९ मा १९८ जनामा डेङ्गु पुष्टि भएको थियो ।
