धनगढी – नेकपा माओवादी केन्द्र सुदूरपश्चिम प्रदेश संसदीय दलका नेता खगराज भट्टले इतिहासले रछ्यानमा मिल्काएका तत्वहरु सलबलाउन थालेको बताएका छन् ।
बिहीबार प्रदेशसभामा सम्बोधन गर्दै उनले जनताको सर्वोच्चता स्थापित भएको यो व्यवस्था उल्ट्याउन इतिहासले रछ्यानमा मिल्काएका तत्वहरु सलवलाउन थालेको बताए ।
‘ती तत्वहरुले संघीयता र प्रादेशिक संरचनाको औचित्य र उपादेयतामाथि प्रश्न उठाउने सामाजिक सद्भाव खल्बल्याउने,साम्प्रदायिक द्वन्द्व सिर्जना गर्ने ,सामाजिक सञ्जालमार्फत कलोलकल्पीत विषय सिर्जना गरेर तरंगित पार्ने काम भइरहेको छ’ उनले भने ‘राजनीतिक दल र निर्वाचित जनप्रतिनिधी संस्थालाई असफल र बदनाम साबित गर्दै देशलाई पश्चगमनतर्फ लैजाने दुस्प्रयास गरिरहेका छन् ।
‘उनीहरुको यो सपना निस्तेज पार्न जनताको निरन्तर निगरानी,हस्तक्षेप,सहभागिता र नियन्त्रणसहितको जनमुखी शासन स्थापित गर्दै प्रगतिशील रुपान्तरणसहित कडा प्रतिवादमा उत्रिनु सबै राजनीतिक दलहरुको अनिवार्य दायित्व र कर्तव्य हो’ उनले भने ‘यसमा हाम्रो सम्मानित सदन र सरकार अब्बल सावित हुने विश्वास गर्दछु’ ।
त्यस्तै भट्टले भुकम्प पीडितको व्यवस्थापन गर्न सरकारसँग माग गरे । ‘बझाङ लगायत सुदूर पहाडका जिल्लामा भुकम्पले जन धनको क्षति पु¥याएको छ,निरन्तर भुकम्पको धक्का आइरहेको छ’ उनले भने ‘सरकारले दसैँ अगावै उनीहरुको सुरक्षित अस्थायी आवास र गास,वासको उचित व्यवस्था गरोस् भन्ने माग गर्न चाहान्छु’ ।
इजरायलमा भएको विद्रोही समूहको आक्रमणको प्रसंगमा बोल्दै उनले भने ‘दसैं जस्तो महत्वपूर्ण पर्वको उत्साह मनाउनुपर्ने बेलामा हामी शोकमा छौँ,देश शोकमा छ,हाम्रो प्रदेश शोकमा छ । हामी स्तब्ध छौँ’ ।
‘इजरायलमा विद्रोही समुहको आक्रमणमा परि ज्यान गुमाएको सुदूरपश्चिम र देशका अन्य क्षेत्रका सबैप्रति हार्दिक श्रद्धाञ्जली व्यक्त गर्दछु’ उनले भने ‘शोक सन्तप्त परिवारजनमा गहिरो समवेदना व्यक्त गर्दछु । घाइतेको स्वास्थ्यलाभको कामना गर्दछु’ ।
‘इजरायलमा डरत्रास आतंकका बीचमा रहेका सबै नेपालीलाई यथास्रिघ स्वदेश फर्कने प्रबन्ध मिलाउन प्रदेश र संघीय सरकारसंग विशेष माग गर्न चाहन्छु’उनले भने ‘सम्माननीय प्रधानमन्त्री र संघीय सरकारले इरजायलमा रहेका नेपालीको उद्धारका लागि गरिरहेको पहलका लागि धन्यवाद पनि दिन चाहन्छु’ ।
अर्को प्रसंगमा बोल्दै नेता भट्टले भने ‘गेटा मेडिकल कलेजलाई शहीद दशरथ चन्द राष्ट्रिय स्वास्थ्य विज्ञान विश्वविद्यालयमा रुपान्तरण गर्ने संघीय सरकारको निर्णयको स्वागत गर्दै सम्मानिय प्रधानमन्त्री ज्यु र संघिय सरकारलाई हार्दिक धन्यवाद दिन चाहन्छु’ । भष्ट्राचारको अन्त्य र सुशासनको स्थापना लागि सम्मानीय प्रधानमन्त्रीज्यूले चाल्नुभएको कमदको म मुक्तकण्ठले प्रशंसा पनि गर्दछु उनले भने ।
‘नजिकिदै गरेको दसैं,तिहार र छठपर्वको सबैमा हार्दिक शुभकामना व्यक्त गर्दछु’ उनले भने ‘चाडपर्वहरुको यो समयमा हुने कालोबजारी नियन्त्रण,विभिन्न बहानामा यात्रुहरु माथि हुने ठगी,दुर्घटनाका जोखिमसंगै ,अपराधजन्य क्रियाकलाप नियन्त्रणका लागि प्रभावकारी अनुगमन र भरपर्दो सुरक्षा प्रबन्ध गर्न सभामुखमार्फत प्रदेश सरकारलाई आग्रह गर्न चाहन्छु’ ।
