धनगढी- इजरायलमा भएको हमास समूहको आतङ्ककारी हमलामा परी डोटीको शिखर नगरपालिका वडा नम्बर ६ चिउडीका २४ वर्षीय राजन फूलाराको शव छिटो नेपाल ल्याउन आफन्तले माग गरेका छन् ।
सुदूरपश्चिम विश्वविद्यालयमा अध्ययनरत फूलारा भदौ २८ उक्त विश्वविद्यालयबाट कृषि सङ्कायको स्नातक तह उत्तीर्ण गरेर ‘लर्न एण्ड अर्न’ कार्यक्रम अन्तर्गत इजरायल गएका थिए ।
इजरायलमा मृत्यु भएका फूलाराको शव छिटो भन्दा छिटो स्वदेश ल्याउनुपर्ने भन्दै फूलारा उद्धार समाज धनगढीले शुक्रवार कैलालीका प्रमुख जिल्ला अधिकारी युवराज कटेल मार्फत नेपाल सरकारलाई ज्ञापन पत्र पठाएका छन् ।
सरकारले छिटो भन्दा छिटो इजरायलमा मृत्यु भएकाहरूको शव नेपाल ल्याउनुपर्ने फूलारा उद्धार समाज धनगढीका संयोजक शिवकुमार फूलराले बताए । सरकारले दिने राहत भन्दा पहिले छिटो शव नेपाल ल्याइदिनुपर्ने उनले बताए ।
ज्ञापन पत्र बुझ्दै प्रमुख जिल्ला अधिकारी कटेलले उक्त पत्र सरकारलाई पठाउने र शव छिटो नेपाल ल्याउनका लागि पहल गर्ने आश्वासन दिए ।
