धनगढी- कैलालीको गेटामा अस्पताल सञ्चालनमा आएको छ  । बुधबारबाट उपचार सेवासहित सय शय्याको अस्पताल सञ्चालनमा आएको हो । बुधबारबाट जनरल फिजिसियन,जनरल सर्जरी,अर्थो,गाइने,रेडियोलोजी,ल्याव एक्सरे,अल्ट्रा साउण्डलगायतका सेवा सुरु भएको गेटा अस्पतालका निर्देशक वरिष्ठ कन्सलटेन्ट अर्थोपेडिक सर्जन डा. प्रमोद जोशीले जानकारी दिए ।

आगामी दिनमा अन्य सेवाहरु पनि विस्तार गरिँदै लैजाने उनले बताए । ‘अहिले केही सेवाहरु सुरु गरेका छौँ’ उनले भने ‘आगामी दिनमा सेवा विस्तार गर्दै लैजान्छौँ’ । हाल अस्पतालमा ११ जना कन्सलटेन्ट डाक्टरहरु रहेकोमा ९ जना अस्पतालमा उपस्थित रहेको र २ जना आउने प्रकृयामा रहेको उनले बताए ।

सरकारले सय शय्याको अस्पताल सञ्चालनका लागि १ सय ४१ जनाको दरबन्दी स्वीकृत गरेको छ । जसमा ३१ जना अधिकृत स्तर र १ सय १० जना सहायक स्तरका कर्मचारी रहेको डा. जोशीले बताए ।

सरकारले गेटामा स्वास्थ्य विज्ञान विश्वविद्यालय स्थापनाको घोषणा गरेको थियो । अस्पताल सञ्चालनले विश्वविद्यालय सञ्चालनको जग बन्ने डा. जोशीले बताए । उनले भने ‘विश्वविद्यालय सञ्चालन गर्न अस्पताल चाहिन्छ,विश्वविद्यालयको जग बनाउन पनि अस्पताल सञ्चालन गर्न आवश्यक छ ।

गेटामा अस्पताल सञ्चालनका लागि सरकारले चालु आवमा चालुतर्फ साढे ३ करोड र पुँजीगततर्फ ८० करोड बजेट विनियोजन गरेको छ । डा. जोशीका अनसार चालुतर्फको बजेट १ सय ४१ जना कर्मचारीका लागि पर्याप्त नहुने बताए ।

गेटामा मेडिकल विश्वविद्यालय सञ्चालनका लागि भन्दै पाँच अर्बका भौतिक संरचना निर्माण गरिएका छन् । भने केही संरचना निर्माणाधिन अवस्थामा छन् ।