घोडाघोडी- कैलालीको घोडाघोडी–४ जनकपुरका हरिकृष्ण न्यौपाने छोराको मृत्युको खबरसँगै शोकमा छन् । ७५ वर्षीय न्यौपानेलाई प्यालेस्टाइनी विद्रोही हमासले इजरायलमा गरेको आक्रमणमा छोरोको मृत्यु भएको खबर सुनेदेखि न त दिनमा भोक छ न रातीको निन्द्रा ।

दिनभरि घरमा आफन्त, इष्टमित्र न्यौपानेलाई सान्त्वना दिन, सम्झाउन आउँछन् । वृद्ध न्यौपाने एक छिन मन थामे पनि भक्कानिँदै अचेत अवस्थामा पुग्छन् ।

आमा सीता न्यौपानेको हालत उस्तै छ । छोराको मृत्युको खबर सुनेदेखि निद्रा, भोक, चैन छैन । आफ्नै कोखबाट जन्म नदिए पनि आफ्नो सन्तानभन्दा बढी माया र स्नेह दिएर हुर्काएको छोरा नारायणको इजरायलमा मृत्यु भएको खबर पाएकी सीतालाई त्यो खबर सत्य नभइदिए हुन्थ्यो भन्ने अझै लागिरहेको छ ।

असोज २० गते शनिवार प्यालेस्टाइनी विद्रोही हमासले इजरायलमा गरेको आक्रमणमा परी १० नेपालीले ज्यान गुमाए । तीमध्ये कैलाली घोडाघोडी नगरपालिका ४ का नारायणप्रसाद न्यौपाने पनि एक हुन् ।

मृतक नारायणका बुवा हरिकृष्ण कसैसँग बोल्ने मन पनि गर्दैनन् । आमा सीता भने मन दरो बनाएर वृद्ध श्रीमानलाई बेला बेला सम्झाउने गर्नुहुन्छ ।

सीताले मृत्यु भएको यतीका दिनसम्म शव नआउनु सरकारको दोष रहेको बताए । “मृत्यु भएको १२ दिनसम्म लास नआउँदा परिवारमा के बितिरहेको छ भन्ने कुरा सरकारले किन महसुस गरेको छैन ?” सीताले प्रश्न गरे ।

दसैँको मुखमा बाहिर गएका छोराहरू घर फर्किरहेका छन् । पढेर ज्ञान सिक्न विदेशी भूमिमा गएको छोरोको मृत्यु भएपछि शव कहिले आउला भन्दै दिन गनेर न्यौपाने परिवार बस्न बाध्य भएको छिमेकीहरू बताउँछन् ।

मृत्युको पिडा एकातर्फ छ भने शव समयमा नआउँदा परिवारमा थप पिडा भएको छिमेकी यशोदा बमले बताए । धान खेती भित्र्याउन कामको चटारो छ, गाउँका मानिस पनि काममा व्यस्त हुन थालेका छन् ।

तर न्यौपाने परिवारमा घरको आशालाग्दो सन्तान गुमाउँदा र समयमा शव घरमा नआउँदा छट्पटिदै तड्पिरहेको छिमेकी बमले बताए । छोरा नारायण पढ्दै कमाउँदै गर्न इजरायल गएका थिए । गएको एक महिना नपुग्दै मृत्यु भएको खबर आयो ।

नारायणको काकी दुर्गाले भनिन् “बाबुको मृत्यु भएको भन्ने खबर हामीले सुन्यौ । मलाई त त्यो खबर नै गलत हो जस्तो लागेको छ । अहिलेसम्म पनि शव आएको छैन त्यो खबर गलत नै भइदिए हुन्थ्यो जस्तो लागिरहेको छ ।”

मृत्युको खबरले विक्षिप्त बनेको न्यौपाने परिवारमा सबैभन्दा बढी चिन्ता वृद्ध बुवाको छ । सीताले भनिन् “बिरामी बुवा औषधी खाइरहनुपर्छ, जे जस्तो अवस्थामा छ छोरालाई छिटो घर पुर्‍याइदिए सबै जना ढुक्क हुने थियौ ।”

नारायण परिवारका तीन छोरामध्ये माइला छोरा हुन् । उनी ६ वर्षको हुँदा आफ्नो आमाको मृत्यु भए पछि हरिकृष्णले दोस्रो विवाह गरेर सीतालाई भित्र्याउनु भएको थियो ।

आफ्नै कोखबाट जन्मेको सन्तान भन्दा बढी माया र स्नेह दिएर हुर्काएकी सीतालाई मृत्युको खबर आएको लामो समयसम्म नारायणको शव नआएपछि घरमा सन्नाटा र पीडा छ । गोरखापत्रबाट