दार्चुला- दसैँको अवसरमा दार्चुलाका प्रमुख धार्मिक स्थलमा भक्तजनको भिड बढेको छ । देशकै सातधाम मध्येको मालिकार्जुन मन्दिर मड, लटिनाथ मन्दिर जयपुर, हुनैनाथ मन्दिर औतालेक, गलैनाथ मन्दिर बन्तोलीलगायत दर्जनौँ प्रसिद्ध धार्मिक एवं ऐतिहासिक शक्तिपीठमा नवरात्र सुरु भएदेखि नै सयौँ भक्तजनको भिड बढेको हो ।
दसैँको समयमा दार्चुलाका अधिकांश देवीदेवताका मन्दिरमा विशेष पूजापाठसँगै पशु बलि दिनेगरिन्छ । शुद्ध मनले देवीदेवताको दर्शन गर्दा मनोकामना पूरा हुने जनविश्वास रहेकाले मनोकामना पूरा भएकाले दसैँमा भाकलअनुसार बलि दिने गरेका छन् ।
दार्चुलासँगै सुदूरपश्चिमका विभिन्न जिल्ला र भारतको उत्तराखण्डबाट समेत भक्तजन मन्दिरमा आउनेगरेका छन् । विभिन्न कारण बाहिरिएकाहरू धमाधम घर फर्कन थालेपछि यहाँका गाउँघरमा रौनकता छाएको छ ।
शक्तिपीठमा भक्तजनको घुइचो लागेको छ । घटस्थापनादेखि सुरु भएको पूजापाठ दसैँको दिनसम्म जारी रहने जयपुर मन्दिरका भण्डारी मनिदत्त बिष्टले बताए ।
बसाइँसराइँ गरेर तराई गएका भक्तजनसमेत दसैँको समयमा पुख्र्यौली गाउँका मन्दिरमा पुग्ने गरेका छन् । शक्तिपीठमा पूजाआजासँगै दमाहालगायत बञ्चेबाजा बजाउने, बलि गर्ने, विभिन्न खेलहरु खेल्नेलगायत गतिविधिहरु निरन्तर भइरहेका छन् ।
