टीकापुर । कैलालीको टीकापुर नगरपालिका–१, ब्लक नं. १७ स्थित श्री जालपा देवी मन्दिर परिसरमा श्रीमद् भागवत सप्ताह ज्ञान महायज्ञ हुने भएको छ ।
माण्डब्य वंशीयसँग सम्बन्धित जालपा देवी मन्दिर परिसरमा कार्तिक १५ गतेबाट महायज्ञ हुने भएको हो । यही कार्तिक १५ गते (बुधबार)बाट हुने महायज्ञ २१ गतेसम्म एक हप्तासम्म सञ्चालन हुने जालपा जागरण समाज टीकापुरका अध्यक्ष ताराप्रसाद अधिकारीले जानकारी दिए ।
महायज्ञको बुधबार बिहान ११ बजे सुदूरपश्चिम प्रदेश प्रमुख देवराज जोशीले उद्घाटन गर्ने कार्यक्रम रहेको समेत अध्यक्ष अधिकारीले बताए । बिहान ७ बजे दिव्य, भव्य कलश शोभा यात्रा हुने भएको समेत अध्यक्ष अधिकारीले बताए ।
अधिकारीले प्रत्येक दिन बिहान ५ बजेबाट ७ बजेसम्म योग साधना, ८ बजेदेखि ११ बजेसम्म पूजापाठ, हवनलगायत हुने,त्यस्तै प्रत्येक दिन बिहान ११ बजेदेखि ४ बजेसम्म संगीतमय भागवत प्रवचन हुने उनको भनाइ छ ।
यस कार्यक्रममा विवाह, ब्रतिबन्ध, ग्रहशान्ति, लक्षवर्ति, तुलादान, भूमिदान जस्ता अनुष्ठानहरु हुने पनि जनाइएको छ ।महायज्ञमा दानवीरहरुलाई सम्मान कार्यक्रम समेत गरिने आयोजकले जनाएको छ । आयोजकका अनुसार महायज्ञको ८० प्रतिशत व्यवस्थापन भइसकेको छ ।
