धनगढी– नेकपा (माओवादी केन्द्र)की केन्द्रीय सदस्य तथा सुदूरपश्चिम प्रदेश सभा सदस्य लक्ष्मी विकले गृह जिल्ला दार्चुलामा जनतासँगको भेटघाटलाई तिब्र बनाएकी छन् । तराइमा जन्मिएर पहाडी जिल्ला दार्चुलालाई कर्मथलो बनाएकी सांसद विक आफ्नो सानो दुधे बालक (छोरी) माइतीघरमा छोडेर जनताका पीरमर्का बुझ्न उकाली ओराली गर्दै जनताका घरदैलोमा पुगिन् ।
यतिबेला जनताका समस्या बुझ्न घरदैलोमा पुग्ने जनप्रतिनिधि विरलै भेटिन्छन् तर सांसद विक भने जनताका समस्या बुझ्न जनताका घरघरमा पुगेकी छन् । जनतासँग भेटघाटका लागि कार्तिक ९ गते दार्चुला प्रस्थान गरेकी सांसद विकले इजराइलमा ज्यान गुमाएका दार्चुलाका लोकेन्द्र धामीको परिवारलाई भेटिन् ।
उनले लोकेन्द्रका बुवा,आमा,नाबालक छोरीछोरी र धर्मपत्नीसँग भेटघाट गरेकी छन् । भेटमा लोकेन्द्रका परिवारले बालबच्चाको पढाइ लेखाइमा र रोजगारीका लागि सरकारले सहयोग गरी दिए सहज हुने माग राखेको बताउँदै सांसद विकले आफ्नो क्षमताले भ्यायसम्मको सहयोग गर्ने प्रतिबद्धता जनाएको बताइन् । सांसद विकले भेटमा मृतकप्रति श्रद्धाञ्जली र सोकसन्तप्त परिवारजनमा गहिरो समवेदना प्रकट गरेकी थिइन् ।
त्यसपछि उनले दार्चुलाको महाकाली नगरपालिका र मालिकार्जुन गाउँपालिकाका जनताको घरदैलोमा पुगेर जनताका समस्या बुझ्ने काम गरिन् । उनी मालिकार्जुन गाउँपालिका– ७ डिन्सी रतकोटलगायत क्षेत्रका जनताको समस्या बुझ्न कृषि ज्ञानकेन्द्रको प्राविधिक टोलीसहित किसानका घरदैलोमा पुगिन् ।
कार्तिक १९ गते आइतबारसम्म दार्चुलामा जनतासँगको भेटघाटमा रहेकी सांसद विकले ग्रामीण क्षेत्रमा किसानका विभिन्न समस्या रहेको बताइन् । उनले त्यहाँका जनताले कृषि क्षेत्रमा भोग्नु परेको समस्या तथा समाधानका बारेमा प्रत्यक्ष रूपमा अन्तरक्रिया गरिएको बताइन् ।
उनले किसानलाई दिइने ५० प्रतिशत अनुदानमा तराइ,पहाड र हिमालमा एकै प्रकारको नीति हुँदा किसानहरु मर्कामा परेको बताइन् । ५० प्रतिशत अनुदान विभेदकारी भएको जनगुनासो रहेको सांसद विकले बताइन् । उनले विकट क्षेत्रमा ढुवानीलगायतका समस्या हुने भएकाले सबै क्षेत्रमा एकै प्रकारको अनुदान नीतिले समस्या भएको बताउँदै यो बिषयमा प्रदेशसभामा आवाज उठाउने बताइन् ।
त्यस्तै किसानका बजारीकरण,व्यवस्थापनमा पनि समस्या रहेको उनको भनाइ छ । ग्रामीण क्षेत्रका किसान अहिले पनि परम्परागत खेती गर्न बाध्य भएको बताउँदै उनले किसानको सीप विकास गरी आधुनिकीकरण गर्दै लैजानु पर्ने बताइन् । उनले आफूले यी समस्या समाधानका लागि सकेसम्मको सहयोग गर्ने प्रतिबद्धता जनाएको बताइन् ।
उनले कृषी क्षेत्रलाई बृहत बनाउन्,बजारीकरण,आधुनिकीकरण गर्न सहयोग पु¥याउने उदेश्यले कृषि प्राविधिकको टोली गाउँमा लगेर गएको बताइन् । त्यस्तै उनले स्थानीय तह र प्रदेश सरकारको तालमेल नभएको पाइएको बताइन् ।
स्थानीय र प्रदेश सरकारको समन्वय,तालमेल नभएकाले जनता मर्कामा रहेको सांसद विकले बताइन् । ‘यी सरकारबीच समन्वय,सहकार्य हुन जरुरी रहेको छ’ उनले भनिन् । भेटघाटकै क्रममा ५० जना विपन्न किसानलाई तरकारीको बीउ वितरण गर्नुका साथै प्राविधिक टोलीले लगाउने तरिका समेत सिकाएको उनले बताइन् ।
