धनगढी- नेकपा माओवादी केन्द्रकी केन्द्रीय सदस्य तथा सुदूरपश्चिम प्रदेशसभा सदस्य लक्ष्मी विक सामाजिक सम्मानबाट सम्मानित भएकी छन् । पूर्व अर्थमन्त्री डा.यादवप्रसाद पन्तको ९९ औँ जन्म जयन्तीको अवसरमा डा.यादवप्रसाद पन्त अनुसन्धान तथा विकास प्रतिष्ठान नेपालले शनिबार काठमाण्डौँमा आयोजना गरेको अभिनन्दन तथा सम्मान कार्यक्रममा विकलाई सामाजिक सम्मान प्रदान गरिएको हो ।
टेवा नेपालको सहयोगमा दलित महिला संघ दार्चुलाले जिल्लाका बाढी पहिरो पीडितहरुलाई खाद्यान्न, गर्भवतीहरुलाई न्यानो कपडा,बालबालिकाहरुलाई स्टेशनरी,पोशाक लगायतका राहत सामाग्री वितरण गरि प्राकृतिक प्रकोपमा समेत उल्लेखनीय कार्य गरे बापत डा.पन्त अनुसन्धान तथा विकास प्रतिष्ठानले उक्त संस्था तथा त्यसको नेतृत्व गर्ने विकलाई नगद पच्चीस हजार तथा सम्मान पत्र सहित सामाजिक सम्मान गरेको सांसद विकको सचिवालयले जनाएको छ ।
सांसद विक दुई दशक बढी लामो समयदेखि राजनीति र सामाजिक क्षेत्रमा निरन्तर सक्रिय रहेकी छन् । विद्यार्थी जीवनदेखि राजनीतिमा सक्रिय रहेकी विक सामाजिक विभेद, असमानता, छूवाछुत,लैगिक विभेद, अन्यायका विरुद्ध निरन्तर आवाज उठाउने निडर व्यक्ति हुन । उनी २०५६ सालदेखि अनेरास्ववियु ( छैठौं ) को सदस्यता लिइ विभिन्न पदमा रहेर सुदूरपश्चिम प्रदेशमा विद्यार्थी राजनीतिमा जिल्ला अध्यक्ष हुने पहिलो दलित महिला हुन ।
मसाल निकट जनमोर्चा नेपालमा एक दशक लामो राजनीतिक जीवनमा पार्टी तथा जनवर्गीय संगठनहरुका विभिन्न जिम्मेवारीमा रही २०६६ सालमा पार्टी एकतावाट नेकपा माओवादी केन्द्रबाट राजनीतिमा रहेकी युवा नेतृ विक हाल पार्टीको केन्द्रीय सदस्य तथा दार्चुला जिल्ला इन्चार्ज हुन् ।
जातीय तथा लंैगिक विभेदको दोहोरो उत्पीडन, विभेद, छूवाछुत र वहिष्करणमा परेका दलित र सीमान्तकृत महिलाहरुको हक अधिकार,आर्थिक,सामाजिक र राजनीतिक सशक्तीकरणका उदेश्यले २०७१ सालमा दलित महिला संघ दार्चुला नामक संस्था जिल्ला प्रशासन कार्यालय दार्चुलामा दर्ता गरि स्थापना भएको सामाजिक संस्थाले विभिन्न सरकारी तथा गैरसरकारी संस्थाहरुको समन्वय सहकार्य र सहयोगमा दलित गरिब विपन्न महिलाहरुको शशक्तीकरण, क्षमता तथा नेतृत्व विकास, जीविकोपार्जन, सामाजिक सचेतना, राजनीतिक सहभागीताका क्षेत्रमा उल्लेखनीय काम गर्दै आएको छ । जसको नेतृत्व सांसद विकले गरिरहेकी छन् ।
