धनगढी– सुदूरपश्चिम महोत्सवको १७ औँ संस्करण यही मंसिर २२ गतेबाट सुरु हुने भएको छ । कैलाली उद्योग वाणिज्य संघले शुक्रवार पत्रकार सम्मेलन गर्दै महोत्सव यही मंसिर २२ गतेदेखि पौष २ गतेसम्म सञ्चालन गर्ने जानकारी गराएको हो ।
सुदूरपश्चिम प्रदेशको पर्यटन, कृषि र उद्योग व्यापारको विकास तथा विस्तारका साथै संस्कृति र कलाको प्रवर्द्धनका लागि महोत्सव आयोजना गर्न लागिएको कैलाली उद्योग वाणिज्य संघका अध्यक्ष पुष्पराज कुँवरले बताए ।
उनले महोत्सव सुदूरपश्चिमको समग्र विकासका सम्भावनाहरूलाई उजागर गर्ने तथा पछिल्लो समयमा विविध कारण सृजित आर्थिक सामाजिक प्रतिकुलता र विषम सामाजिक परिस्थितिबाट गुज्रिरहेको उद्योग व्यवसायलाई आशावादी बनाइ पुनः स्थापित गर्न महोत्सव उपलब्धिमूलक हुने विश्वास व्यक्त गरे ।
महोत्सवमा बृहत् व्यवसायीक कृषि प्रदर्शनी तथा प्रतियोगिता, ताजा तरकारी र कृषिमा आएको प्रविधिसँगै माछा, केरा, पोल्ट्री, दुग्धजन्य पदार्थ, च्याउ आदी व्यवसायलाई प्रदर्शनीमा विशेष जोड दिइएको अध्यक्ष कुँवरले बताए । महोत्सव अनुमानित दुई करोडको लगानीमासम्पन्न गरिने तथा महोत्सवमा उद्योगी व्यवसायको १० करोड बराबरको कारोबार हुने अनुमान गरिएको उनले बताए ।
महोत्सवमा कृषि, जडीबुटी हस्तकला,फर्निचर, अटोमोबाइल्स, गार्मेन्ट, इलेक्टोनिकल, होटल र सूचना प्रविधि गरी चार सय जतिको संख्यामा स्टलहरूको सहभागिता रहने कैलाली उद्योग वाणिज्य संघले जनाएको छ ।
महोत्सवलाई भब्यरुपमा सम्पन्न गर्न मूल समिति सहित ३० उप समिति रहनुका साथै महोत्सवमा स्थानीय उत्पादन र महिला उद्यमीलाई प्रोत्साहन गरिएको तथा महोत्सवमा करिब पाँच लाख व्यक्तिले अवलोकन गर्ने जनाइएको छ ।
महोत्सव अवलोकनको लागि विद्यार्थीलाई रुपैयाँ ५०,सर्वसाधारणलाई रु एक सय टिकट दर राखिएको र फरक क्षमता भएकालाई निःशुल्क गरिने जनाइएको छ ।
सुदूरपश्चिम कला संस्कृतिमा सम्भावना भएका र योगदान दिएका कलाकारहरूलाई स्टेजमा प्राथमिकता दिइने छ जनाइएको छ । कैलाली उद्योग वाणिज्य संघले २०६३ सालदेखि सुदूरपश्चिम महोत्सवको आयोजना गर्दै आएको छ । महोत्सव धनगढी उपमहानगरपालिका–१ को पशुपति टोलमा सञ्चालन हुने जनाइएको छ ।
