धनगढी- नेपाली कांग्रेसका सहमहामन्त्री एवम् प्रतिनिधिसभा सदस्य बद्रीप्रसाद पाण्डेले ऐन बनेलगत्तै कैलालीको गेटामा मेडिकल विश्वविद्यालय स्थापना हुन नसक्ने बताएका छन् । आइतबार धनगढी आइपुगेका उनले सुदूरपश्चिमका नागरिकको सुविधाका लागि सरकारले तत्काल तीन सय शैय्याको अस्पताल सञ्चालन गर्नुुपर्ने माग गरे ।
‘ऐन त बन्ला, ठीक छ, तर यही गतिले सुदूरपश्चिमका बासिन्दाको आकांक्षाअनुरुप तत्काल शिक्षण अस्पतालसहितको मेडिकल विश्वविद्यालय सञ्चालन हुने छाँट देखिँदैन,’ सहमहामन्त्री पाण्डेले भने, ‘अहिलेसम्म हामी मोडालिटीको छलफलमा मात्र केन्द्रित भयौं । तर मेडिकल विश्वविद्यालयका लागि चाहिने अन्य पूर्वाधारका बारेमा त छलफल नै भएको छैन । विशाल भवनमात्र भएर मेडिकल विश्वविद्यालय सञ्चालन भइहाल्छ भन्ने हुन सक्दैन ।’
हाल गेटामा एक सय शय्या अस्पताल स्थापना गर्ने कार्य अनुपयुक्त भएको उनको भनाइ छ । ‘गेटामा एक सय शय्या अस्पतालको के अर्थ छ ?,’ उनले भने, ‘विश्वविद्यालय आफैँमा भेग विषय हो । ऐन बनुुञ्जेल मेडिकल विश्वविद्यालय स्थापनाका लागि आवश्यक पर्ने अन्य पूर्वाधारहरुको तयारी गर्दै गर्न पनि सकिन्छ ।’
मोडालिटीका बारेमा धेरै छलफल भएको भए पनि त्यसका लागि आवश्यक अन्य पूर्वाधारका बारेमा भने कसैले पनि विषय नै प्रवेश नगरेको उनको भनाइ छ । सरकारले कैलालीको गेटामा सहिद दशरथ चन्द राष्ट्रिय स्वास्थ्य विज्ञान विश्वविद्यालय स्थापनाको निर्णय गरेको छ । सो विधेयक हाल राष्ट्रिय सभामा विचाराधीन छ ।
