धनगढी- मोहन बैद्य नेतृत्वको क्रान्तिकारी कम्युनिस्ट पार्टी, नेपाल कैलालीले धनगढी उपमहानगरपालिकाले समस्याहरुको समाधानमा ध्यान नदिएको भन्दै आन्दोलनका कार्यक्रम सार्वजनिक गरेको छ । धनगढीमा आज (सोमवार) पार्टीले पत्रकार सम्मेलन गर्दै उपमहानगरपालिकालाई जनजीविका, जनतन्त्र र जनअधिकारका विषयमा सम्बोधनका लागि हुलाकमार्फत अल्टीमेटम पठाउँदा समेत समाधानतर्फ ध्यान नदिएपछि आन्दोलनका कार्यक्रम सार्वजनिक गरिएको हो ।

‘धनगढी उप महानगरपालिकालाई जनजीविका, जनतन्त्र र जनअधिकारका बिषयमा पौष २१ गते नगर प्रमुखलाई सम्बोधन गरी ४८ बुँदे मागपत्र १५ दिने अल्टीमेटम सहित हुलाक मार्फत पठाइएको र उक्त मागहरु सम्वन्धमा कुनै सुनुवाई नभएकोले समस्याहरुको समाधानका लागि केही भएनन्’ पार्टीका बाजुरा इन्चार्ज केशब उपाध्यायले भने ।

उनका अनुसार पहिलो चरणमा माघ १० गते वडा कार्यालयहरुमा, माघ १२ गते कार्यपालिका शाखाहरुमा र माघ १५ गते सम्पूर्ण शैक्षिक संस्थाहरुमा माग पत्र बुझाउने कार्यक्रम रहेको छ । माघ १० गते सामाजिक विकास मन्त्रालय, जिल्ला प्रशासन कार्यालय कैलाली, मुख्य मन्त्री तथा मन्त्री परिषदको कार्यालयमा माग पत्र बुझाउने कार्यक्रम रहेको छ ।

यसका साथै माघ १० गते नगर प्रमुखको घरमा कालो ब्यानर टाँस्ने कार्यक्रम रहेको उनको भनाई छ । सोही दिन कार्यलय समय र सम्बन्धीत व्यक्ति बाहेक सवारीसाधन चलाइएको पाइएमा कालोमोसो दल्ने पार्टीको आन्दोलनको कार्यक्रम रहेको जनाइएको छ ।

आन्दोलनको कार्यक्रम अन्र्तगत माघ २० गते वालपेन्टीङ्ग गर्ने, १५ गतेसम्म सरकारी शैक्षिक संस्था (१ देखि १२ सम्म) हरुले शुल्क फिर्ता गराउने र नीजि स्वास्थ्य संस्थाहरुले राज्यले तोकेको सेवा शुल्क भन्दा बढी शुल्क हटाउनु पर्ने छ । माघ १२ गतेसम्म सम्पूर्ण सार्वजनिक कार्यालयहरुका शौचालय सफा र व्यवस्थीत गर्नु पर्ने पार्टीको माग रहेकोछ ।

माघ १५ गते सम्म वडा नं। ११ मा रहेको बहिरा विद्यालयमा तत्काल उचित गाँस, बास र कपासका लागि २० लाख उप महानगरले व्यवस्था गर्नुपर्ने, माघ १५ गतेसम्म छाडा पशु चौपायाहरुको उचित व्यवस्थापन गर्नुपर्ने, सरकारी विद्यालय, स्वास्थ्य संस्थामा कार्यरत शिक्षक र डाक्टरहरुले नीजि ट्युसन पढाउने र नीजि क्लनिकमा व्यवसाय कार्य वन्द गर्नुपर्ने, विदेशबाट आयातीत तरकारी, फलफुल र माछा जाँच गरी आयातलाई व्यवस्थित गरिनुपर्ने आन्दोलनको कार्यक्रममा रहेको छ ।

अन्तरक्रिया कार्यक्रमहरु माघ १५ देखि २० गतेसम्म सम्पन्न गर्ने र घर धनिहरुले घरबाहलहरुसँग चर्को रुपैयाँ प्रति युनिट विद्युत महशुल र बहाल करपनि सम्बन्धी घरवाहलवालाबाट नै लिने गरेकाले तत्काल बन्द गराउनुपर्ने सो कार्यक्रममा रहेको छ । उनले भने –‘समस्याहरुको समाधान माग माघ १६ गतेसम्म नभए हुन आउने परिणामको जिम्मेवार सम्वन्धीत निकायले व्यहोर्नुपर्ने छ ।’