धनगढी- सुदूरपश्चिम प्रदेशमा चालु आर्थिक वर्षको ६ महिनाको अवधिमा १०६ जना कुष्ठरोग फेला परेका छन् । ७१ औँ विश्व कुष्ठरोग दिवसको अवसरमा स्वास्थ्य कार्यालय कैलालीले शनिवार धनगढीमा पत्रकारहरुसँँग अन्तरक्रिया तथा छलफल कार्यक्रमको आयोजना गर्दै यो तथ्याङ्क सार्वजनिक गरेको हो ।
स्वास्थ्य निर्देशनालय डोटीका अनुसार आर्थिक वर्ष २०७९/८० मा कुष्ठरोगका नयाँ बिरामी २३० जना फेला परेका थिए । जसमध्य गत आर्थिक वर्ष कुल २७ं९ जना कुष्ठरोगका बिरामी फेला परेको स्वास्थ्य निर्देशनालयले जनाइएको छ ।
जसमा गत आर्थिक वर्षमा नयाँ थपिएका सबै भन्दा बढी कैलालीमा १४९ जना, अछाममा २२ जना, बझाङ ५ जना, बैतडीमा ४ जना, डोटीमा ३ जना, दार्चुलामा २ जना र बाजुरा, डडेल्धुरामा १/१ जना बिरामी फेला परेका थिए ।
सुदूरपश्चिमका ८८ वटा पालिकामध्ये ४३ पालिकामा कुष्ठरोग फेला नपरेको र ४५ वटा पालिकामा कुष्ठरोग फेला परेको स्वास्थ्य निर्देशनालयको तथ्याङ्कमा उल्लेख छ ।
पालिका अनुसार नयाँ बिरामीको सख्यामा सबै भन्दा बढी कैलालीको धनगढी उपमहानगरपालिकामा ८७ जना, कैलारी गाउँपालिकामा २२ र कञ्चनपुरको भीमदत्त नगरपालिकामा १७ जना कुष्ठरोगका नयाँ बिरामी फेला परेका छन् ।
सुदूरपश्चिम प्रदेश स्वास्थ्य निर्देशनालय डोटी निर्देशक डा.जगदीश जोशीले यस प्रदेशमा कुष्ठरोगलाई शून्यमा झार्ने लक्ष्य लिएको भएपनि अहिलेसम्म नसकिएको बताए ।
विभिन्न कारण र खुल्ला सिमानाका र समुदायमा लुकेका कारणले गर्दा पनि शून्यमा झार्ने समस्या भएको उनले बताए । कुष्ठरोग नियुनिकरण गर्न जनचेतना फैलाउन आवश्यक रहेको उनको भनाइ छ । कुष्ठरोग निुयुनिकरणमा सञ्चारकर्मीको पनि महत्त्वपूर्ण भूमिका रहेको उनले बताए ।
