धनगढी- शिवनगरस्थित चैतन्य पाठशालामा चैतन्य स्टीम वर्कसप कार्यक्रम मंगलबारदेखि सुरु भएको छ । चैतन्य पाठशाला साइन्स र रोवोटिस बिभागका विद्यार्थीहरुको आयोजनामा सुरु भएको सो कार्यक्रम माघ २२ गतेसम्म सञ्चालन हुनेछ ।
विज्ञान, प्रविधि, अनुसन्धान तथा अन्वेषणमा रुचि राख्ने विद्यार्थीलाई लक्षित गरी प्रयोगात्मक तथा प्रदर्शनीको अवसर सृर्जना गर्ने गरी कार्यक्रम आयोजना गरिएको हो । धनगढीका बिभिन्न बिद्यालयमा अध्ययनरत कक्षा ६ देखि ९ सम्मका विद्यार्थीलाई निःशुल्क रुपमा सहभागी गराइएको छ ।
विज्ञान र प्रविधिको क्षेत्रमा रुचि राख्ने विद्यार्थीलाई वाल्यकाल देखि नै सो क्षेत्रमा लाग्न अभिप्रेरित गर्ने उदेश्य रहेको पाठशालाका सिइओ गणेश प्रसाद जोशीले बताए । ११ ओटा बिधामा एक हप्तासम्म वर्कसप कक्षा चलाउने र रिमोट कन्ट्रोलबाट प्लेन पनि उडाउने योजना रहेको उनले बताए ।
कार्यक्रममा रुपमा कृत्रिम बुद्धिमत्ता शिविर, रकेट विज्ञान शिविर, खगोल विज्ञान शिविर, रोबोटिक्स शिविर, उड्डयन शिविर, उपग्रह शिविर, ड्रोन प्रदर्शन, भौतिक विज्ञानको जादू, रोमाञ्चक पुरस्कार संग खेल सिकाई, वैज्ञानिक हार्डवेयर प्रदर्शनी रहने जनाइएको छ ।
विद्यार्थीहरुलाई भावी वैज्ञानिकको रुपमा विकसित गर्न चैतन्य पाठशालाले बर्षभरि नै उपयुक्त वातावरण र आवश्यक श्रोत साधनको व्यवस्थापन गर्ने बताएको छ ।
यस्तै आवधिक रुपमा विद्यालय स्तरीय तथा अन्तर कक्षा विज्ञान, प्रविधि र अन्वेषणको क्षेत्रमा प्रदर्शनी र प्रतिस्पर्धात्मक कार्यक्रम रहने जनाएको छ । सुदूरपश्चिम प्रदेशका उद्योग वन पर्यटन तथा वातावरण मन्त्री रमेशसिं धामीले चैतन्य स्टीम वर्कसप कार्यक्रमले विद्यार्थीको प्रतिभा प्रष्फुटनमा महत्वपूर्ण योगदान पुग्ने विश्वास व्यक्त गरे ।
