धनगढी- तरकारी खेतीबाट भारतीय नागरिकले नेपालमा मनग्य आम्दानी गर्ने गरेका छन् । रोजगारीका लागि भारत जाने नेपालीको सङख्या दिन प्रतिदिन बढ्दै गइरहेका बेला भारतीय नागरिकले भने नेपालमा तरकारी खेतीबाट राम्रो आम्दानी गर्ने गरेका हुन् ।
कैलाली जिल्लाका विभिन्न ठाउँमा तरकारी खेती गरेर भारतीय नागरिकले वार्षिक लाखौँ आम्दानी गर्ने गरेका छन् । भारतको बिहार घर भएका बाहिद खानले कैलालीको गोदावरी नगरपालिका–५ गेटामा तरकारी खेती गरेको सात वर्ष भयो ।
स्थानीयको ३ विगाहा जग्गा भाडामा लिएर बिगत सात वर्षदेखि तरकारी खेती गर्दै आएको उनले बताए । जग्गाको प्रति विगाहा वार्षिक ५० हजारका दरले भाडा तिर्ने गरेको खानले बताए । उनले भने,‘तरकारी खेतीबाट बार्षिक १० देखि १२ लाख आम्दानी हुन्छ ।घरखर्च,जग्गाभाडा,बीउबिजन,मलखाद्यदेखि लिएर सबै खर्च कटाएर बार्षिक २ लाखबढी बचत हुन्छ ।’
टमाटर,लौका,खुर्सानी,भान्टा,काक्रा,मुला,बन्दालगायतका तरकारी लगाउने गरेको उनले बताए । आमाबुवाले पहिलेदेखिनै नेपालमा तरकारी खेती गर्दै आएकाले आफू पनि तरकारी खेतीमा लागेको खानको भनाइ छ । उनले भने,‘आमा,बुवा,दिदी,भाइ गरेर हामी यहाँ छ जना बस्छौँ ।
पहिले आमाबुवाले यहाँ तरकारी खेती गर्नुहुन्थ्यो अहिले मैलै तरकारी खेती गर्दै आएको छु ।’ ‘म आफूले गरेको तरकारी खेतीबाट सन्तुष्ट छु । मेहनत गरे सफलता पाइन्छ ।’ उनले भने,‘कमाइ पनि राम्रै भएको छ । बेच्न समस्या हुँदैन । बारीमै पनि किन्न आउँछन् । नजिकैको अत्तरिया बजारमा पनि लगेर बिक्री गर्छु ।’
त्यस्तै जिल्लाको धनगढी उपमहानगरपालिका–५ हसनपुरमा भारतको उत्तर प्रदेश सीतापुर घर भएका महेन्द्र बर्माले बिगत १२ वर्षदेखि तरकारीको बेर्ना उत्पादन गर्दै आएका छन् । उनले यहाँका स्थानीयको ३ कठ्ठा जग्गा भाडामा लिएर बेर्ना उत्पादन गर्ने गरेको बताए । उनले भने,‘तीन कठ्ठामा बेर्ना लगाउने गरेको छु । प्रति कठ्ठाको वार्षिक ७ हजारका दरले भाडा तिर्छु ।’
‘मैले सबैजसो तरकारीको बेर्ना उत्पादन गर्ने गरेको छु । सिजन अनुसारको बेर्ना उत्पादन गर्ने गरेको छु ।’ उनले भने,‘वर्षमा ३ लाख जतिको बेर्ना बिक्री गर्छु । कहिले कम त कहिले बढी आम्दानी हुने गर्छ ।’
‘धेरै जसो किसानले बारीमै आएर बेर्ना किन्नु हुन्छ ।’ उनले भने,‘बजारमा पनि लगेर बिक्री गर्छु । यसमा खर्च पनि छ । आम्दानी राम्रै हुन्छ ।’ तीन छोराहरु भारतमै बस्ने गरेको र श्रीमतीसहित आफू यहाँ कृषि कार्यमा लागेको उनको भनाइ थियो ।
