धनगढी- धनगढी–३ बोराडाँडीस्थित हरुदेवि विष्टका श्रीमान् बितेको १२ वर्ष भन्दा बढी भइसक्यो । सन्तानको नामा छोरी छन् । छोरीको बिहेपछि केही सुख पाउने आशा गरेकी हरुदेवि अहिले झनै समस्यामा छिन् । छोरीको बिहेपछि हरुदेविका ज्वाइँले छोरीको खास्सै वास्ता गरेनन् ।
जसका कारण छोरीलाई बिहेपछि पनि आफैसँग राखेर पाल्नुपर्ने जिम्मेवारी हरुदेविको काँधमा आयो । भैँसीको दूध बेचेर जेनतेन गुजरा चलाउँदै आएकी हरुदेविसंग अहिले भैंसीपनि छैन ।
ज्वाइँले वास्ता गर्न छोडेपछि हरुदेविकी छोरी पूजा विष्ट मानसिक रोगी बनेकिछन् । हरुदेविले आफूसँग भएको भैँसी बेचेर छोरीको उपचारमा लगाइन् । त्यो औषधीले नत छोरी स्वस्थ भएकिछन्, नत आयस्रोतको कुनै अर्को श्रेतनै छ ।
‘छोरीको उपचार गर्न भनेर सस्तैमा भैँसी बेचेँ आफ्ना दुःख पोख्दै हरुदेविले भनिन्, ‘त्यो पैसाले छोरीको रोग निको भएन, थप उपचार गर्न पैसा पनि छैन, अवत बिहान बेलुकाको छाक टार्न पनि नसकिने अवस्था भइसक्यो ।’
उनले छोरीको थप उपचारका लागि ऋण माग्न खोज्दा कसैले नपत्याउने गरेको सुनाइन् । ‘कसैलाई सहयोग मागौँ भने पत्याउँदैनन्, संघ संस्था तथा सरकारी निकाय कहाँ छन् थाहा छैन ।’ उनले छोरीको उपचारका लागि सहयोगको अपिल गरेकिछन् ।
‘डाक्टरले थप उपचारका लागि छोरीलाई भारतको बरेली लैजाऊ भनेका छन्,’ उनले भनिन्, ‘मसँग खाद्यान्न किन्ने पैसा पनि छैन, त्यसैले सबैलाई सकेको सहयोग गरिदिन अपिल गर्नथालेकि छु ।’
हरुदेविलाई छोरी सँगै नातिको पालनपोषण गर्ने अर्को भार थपिएको छ । ‘छोरीबाट एउटा नाति पनि छ,’ हरुदेविले भनिन्, ‘छोरीको घरका मान्छेलाई लैजाऊ भन्दा लग्दैनन्, यहाँ मलाई उसलाई खुवाउन पनि समस्या भइरहेको छ ।’ ‘घरमा अन्न छैन,’ हरुदेविले भनिन्, ‘नत रोजगारी नै छ, छोरी रोगी छे, नातिलाई कति वेला कहाँ लगेर छोड्ने हो भन्ने चिन्ताले घर छोड्न पनि सकिँदैन ।’
