काठमाडौं- नेपाल आयल निगम लिमिटेडले रिक्त रहेको सुदूरपश्चिम प्रादेशिक कार्यालय, धनगढीको प्रमुखमा प्रबन्धक सतिश ओझालाई जिम्मेवारी दिएको छ । करिब एक महिनाअघि धनगढी डिपो प्रमुख मोहनकुमार साहको केन्द्रिय कार्यालयमा सरुवा भएपछि उक्त पद रिक्त थियो ।
यसैगरी वीरगञ्ज शाखा कार्यालयको प्रमुखमा रमेश ज्ञवालीलाई पठाइएको छ । त्यहाँ कार्यरत मनोजकुमारलाई काठमाडौंको सिनामंगल हवाइ इन्धन कार्यालयमा सरुवा गरिएको छ भने विराटनगर विमानस्थलमा हवाइ इन्धन वितरण गर्दै आएको निगमको हवाइ इन्धन कार्यालय प्रमुखमा नवीन खनाललाई पठाइएको छ । त्यहाँ कार्यरत सनम कार्कीलाई कोशी प्रादेशिक कार्यालय, विराटनगरमै जिम्मेवारी दिइएको स्रोतले जानकारी दियो ।
पहिलो पटक कार्यालय प्रमुखको जिम्मेवारी
रोचक के छ भने, निगमले सरुवाको निर्णय लिंदा ओझा, ज्ञवाली र खनालले पहिलो पटक कार्यालय प्रमुखको जिम्मेवारी पाएका हुन् । विगतमा अनुभव भएकालाई डिपो प्रमुखमा छनौट गर्ने प्रवृत्ति थियो । यसपटक भने नयाँलाई जिम्मेवारी दिएर कार्यालय प्रमुखका रुपमा थप कर्मचारी उत्पादन गर्न खोजिएको छ ।
अहिले निगममा कार्यालय प्रमुखको जिम्मेवारी लिने सिमित कर्मचारी मात्रै छन् । जसकारण उनीहरुले नै बारम्बार मौका पाउने र अन्य कर्मचारीहरु अनुभव र योग्यताको परिक्षण हुन नपाउँदा पछि पर्ने गरेका छन् । आयल निगम भित्र डिपो प्रमुखलाई सबैभन्दा आकर्षक पद मान्ने गरिएको छ ।
निगम व्यवस्थापनले धनगढी डिपोको अपरेसन विभाग हेर्ने खगेन्द्र अधिकारी र लेखा प्रमुख प्रबिन पौडेलको पनि इन्धन डिपो, नेपालगञ्ज सरुवा गरेका छ । धनगढीको लेखा प्रमुखमा भैरव रावललाई जिम्मेवारी दिएको छ । रावल गण्डकी प्रादेशिक कार्यालय, पोखराबाट सरुवा भई धनगढी पुगेका हुन् । पोखराको लेखा प्रमुखमा रमेश तिवारीले जिम्मेवारी पाएका छन् ।
