कैलाली- कैलाली र कञ्चनपुरमा डिप तथा स्यालो ट्युबेलमार्फत ५ हजार चार ४८७ हेक्टर जग्गामा बाह्रै महीनाका लागि सिँचाइ सुविधा उपलब्ध गराइएको छ । भूमिगत जलस्रोत तथा सिँचाइ डिभिजन विकास कार्यालयले दिएको जानकारीअनुसार पुरानो र प्रदेश संरचनापश्चात् उक्त सिँचाइ सुविधा उपलब्ध गराइएको हो ।
डिभिजन प्रमुख श्रवण खनालका अनुसार प्रदेश स्थापनापश्चात् कैलाली, कञ्चनपुर र डडेलधुरामा गरी १४० डिप ट्युबेल जडान गरिएको छ । यी क्षेत्रमा अहिले बाह्रै महिना सिँचाइको सुविधा उपलब्ध भएको उनको भनाइ छ ।
जडान गरिएका डिप ट्युबेलमध्ये ९१ चलिरहेका छन् भने अन्य संरचना निर्माणका क्रममा रहेको जनाइएको छ । विशेष गरी कुलो, नहर नभएको ठाउँमा र भएको ठाउँमा पनि बाह्रै महिना सिँचाइ उपलब्ध गराउने गरी किसानको खेतबारीमा डिप र स्यालो ट्युबेल जडान भएको उनले बताए ।
गत आर्थिक वर्ष (आव)सम्म कैलाली र कञ्चनपुरमा १ हजार १ स्यालो ट्युबेल जडान गरिएकामा चालु आवदेखि स्यालो ट्युबेलका लागि बजेट विनियोजन नगरिएको डिभिजन प्रमुख खनालले बताए । स्यालो ट्युबेल जडानको कार्य स्थानीय तहलाई हस्तान्तरण गरिएकाले डिभिजन कार्यालयले त्यसका लागि बजेट विनियोजन नगरिएको जनाएको छ । स्यालो ट्युबेल जडानका लागि वित्तीय हस्तान्तरणअन्तर्गत रु १२ लाख बजेट स्थानीय तहलाई दिएको डिभिजन प्रमुख खनालले जानकारी दिए ।
कैलालीका १३ स्थानीय तहमध्ये गोदावरी नगरपालिकामा ७, गौरीगङ्गा नगरपालिकामा ८, घोडाघोडी नगरपालिकामा ८, लम्कीचुहा नगरपालिकामा १, भजनी नगरपालिकामा ३, धनगढी उपमहानगरपालिकामा २, बर्दगोरिया गाउँपालिकामा ४, कैलारी गाउँपालिकामा १, जोशीपुरमा गाउँपालिकामा ६ डिप ट्युबेल जडान गरिएको जनाइएको छ । अन्य डिप ट्युबेल कञ्चनपुर र डडेलधुरामा जडान गरिएको जनाइएको छ ।
कैलालीको चुरे र मोहन्याल गाउँपालिकामा डिप ट्युबेल जडानका लागि अध्ययन भइरहेको सो कार्यालयले जनाएको छ । एक डिप ट्युबेल जडानका लागि झन्डै रु ८५ लाख खर्च लाग्ने गरेको जनाइएको छ । कैलाली, कञ्चनपुर र डडेलधुरामा प्रदेश, प्रदेश पूर्वाधार र सङ्घ सशर्त अनुदानबाट डिप ट्युबेलका लागि बजेट विनियोजन हुँदै आएको डिभिजन कार्यालयले जनाएको छ । रासस
