धनगढी- सुदूरपश्चिम प्रदेशको सहकारी रजिस्टार प्रशिक्षण कार्यालयको नवनिर्मित भवन उद्घाटन गरिएको छ । भूमि व्यवस्था कृषि तथा सहकारी मन्त्री रामेश्वर चौधरीले बिहीबार एक कार्यक्रमका बिच सो भवन उद्घाटन गरेका हुन् ।
मन्त्रालयसँगै सो भवन निर्माण गरिएको छ । ४ करोड ३४ लाख लागत इस्टिमेट गरिएको भवनको २ करोड ९४ लाखमा ठेक्का सम्झौता गरिएको मन्त्रालयका प्रवक्ता टीकाराम थापाले बताए । यसैबिच भूमि व्यवस्था कृषि तथा सहकारी राज्यमन्त्री कैलाश चौधरीले मन्त्रालयकै आँगनमा गरिएको कार्यक्रममा आफूलाई बेवास्ता गरिएको गुनासो गरेका छन् ।
राज्यमन्त्री चौधरीले भने, ‘म कार्यालय पुग्दा तामझाम देखे । कार्यक्रम सुरु हुँदै गर्दा मात्रै थाहा पाए भवनको उद्घाटन कार्यक्रम रहेछ । मन्त्रालयको कार्यक्रम रहेछ । मलाई एक घण्टा अगाडि वा एक दिन अगाडि पनि त खबर गर्न सकिन्थ्यो । तर सुरु हुँदै गर्दा बोलाउन आए । त्यसपछि जान उचित लागेन र गएन ।’
उता मन्त्रालयका प्रवक्ता टीकाराम थापाले भने, ‘ठूलो कार्यक्रम नभएको र मलाई राज्यमन्त्री चौधरी काठमाडौँ रहेको लागेको थियो । त्यहीभएर पहिल्यै खबर गर्न गरिन्न । तर मैले कार्यक्रम सुरु हुनुभन्दा पहिले उपस्थितिको लागि उहाँको कार्यकक्षमा पुगेको थिए ।’
पछिल्लो समय मन्त्री र राज्यमन्त्रीबिच मन्त्रालयको जिम्मेवारीलाई लिएर मनमुटाब देखिएको छ । उनीहरु दुवै नागरिक उन्मुक्ति पार्टीबाट मन्त्री बनेका हुन् । राज्यमन्त्रीमा नियुक्त भएको लामो समय बितेपनि आफूलाई जिम्मेवारीबिहीन बनाएको राज्यमन्त्री चौधरीको दुखेसो छ ।
