बाजुरा- बाजुराको गौमुल गाउँपालिका वडा –१ माडीमा आगलागीबाट एक घर जलेर पूर्णरुपमा नष्ट भएको छ । हिजो बेलुका ८ः३० बजेको समयमा घरमा सुतिरहेको अवस्थामा आगलागी भएको थियो ।
स्थानीय महेन्द्र रोकायाको घरमा अचानक आगलागी भएको स्थानीय हरिबहादुर रोकायाले बताए । घरको भान्छाबाट आगलागी भएको बताइएको छ ।
आगलागीबाट घरमा रहेका अन्नपात, लत्ताकपडा, भाँडाकुँडालगायत सामग्री जलेर नष्ट भएको घरका सदस्यले बताएका छन् । आगलागीबाट मानवीय क्षति भने नभएको उनीहरुको भनाइ छ ।
आगलागीको थप तथा यकिन विवरणका लागि इलाका प्रहरी कार्यालय गौमुल गाउँपालिकाबाट प्रहरी टोली घटनास्थल गएको जिल्ला प्रहरी कार्यालय बाजुराले जनाएको छ ।
