धनगढी – नेकपा एमाले कैलाली जिल्लाको ९औं जिल्ला अधिवेशनमा उपसचिवका लागि मदनराज रेग्मीको सशक्त दाबी रहेको छ । आगामी फागुन ६ र ७ गते सुख्खडमा हुने सो अधिवेशनमा उनले उपसचिवका लागि सशक्त दाबी गरेका हुन ।
युवा संघबाट आफ्नो राजनीति सुरु गरेका र युवा संघ नेपाल कैलालीका पूर्व अध्यक्ष समेत भई सकेका रेग्मीको नेकपा एमाले पार्टीको जिल्ला उपसचिवको लागि विशेष चर्चा हुने गरेको छ । नेकपा एमाले पार्टी वडा सदस्य, नगर सदस्य, क्षेत्रीय कमिटी सचिव हुँदै नेकपा हुँदा धनगढी उपमहानगरपालिका कार्यालय सदस्य समेत भईसकेका रेग्मी हाल नेकपा एमाले पार्टीका जिल्ला कमिटी सदस्य हुन । अखिल नेपाल किसान महासंघ प्रदेश अध्यक्ष समेत भएका रेग्मी युवामाँझमा लोकप्रिय नेताको रुपमा परिचित छन् ।
राजनीतिसँगै व्यवसायमा पनि रहेका रेग्मी सामाजिक कामहरुमा पनि त्यत्तिकै व्यस्त हुन्छन् । नम्र स्वभाव,पारदर्शी व्यवहार र परिपक्वता उनका प्रमुख विशेषता हुन् ।
आफ्नो जिम्मेवारी र भूमिकालाई कुशलताकासाथ निभाउन सक्ने क्षमता रेग्मीमा छ। उनी राजनितीक दलले सुरु गरेका हरेक आन्दोलनमा अग्रणी भूमिकामा रहँदै आएका छन ।
आगामी अधिवेशनबाट रेग्मीलाई सर्वसम्मत अघि सारिने र त्यो सम्भव नदेखिए निर्वाचन प्रक्रियामार्फत भएपनि उपसचिवमा ल्याई छाड्ने प्रतिनिधिहरुको इच्छा रहेको एमाले कैलालीका नेताहरु बताउँछन् ।
