धनगढी- धनगढीको ग्यालेक्सी मल्टिपल कलेजमा (भोलि) शनिवार ग्यालेक्सी बिजनेस हाजिरी जबाफ प्रतियोगिता आयोजना गरिने भएको छ । धनगढी उपमहानगरपालिका वडा नम्बर १ पशुपति टोलमा रहेको ग्यालेक्सी मल्टिपल कलेजको आयोजनामा कक्षा ११ र १२ मा व्यवस्थापन संकायमा अध्ययनरत विद्यार्थीहरूको सहभागिता हुने गरी प्रथम ग्यालेक्सी बिजनेस हाजिरी जबाफ प्रतियोगिता आयोजना गरिने भएको हो ।

ग्यालेक्सी कलेजले पहिलो पटक आयोजना गर्न गइरहेको बिजनेस हाजिरी जबाफ प्रतियोगितामा धनगढी उपमहानगरपालिका भित्रका विभिन्न माध्यमिक विद्यालयको सहभागिता रहने जनाइएको छ ।

बिजनेस हाजिरी जबाफ प्रतियोगितामा प्रथम स्थान प्राप्त गर्ने टिमलाई नगद रु ७ हजार पुरस्कार प्रदान गरिने जनाइएको छ । भने द्वितीय र तृतीय स्थान प्राप्त गर्ने टिमलाई क्रमशः ५ हजार र ३ हजार पुरस्कार प्रदान गरिने छ । हाजिरी जबाफ प्रतियोगितामा सहभागिताका लागि रु १ हजार प्रवेश शुल्क निर्धारण गरिएको छ ।

व्यवस्थापन संकाय प्रति विद्यार्थीहरूको रुचि बढाउन, व्यवसाय र व्यापार प्रति विद्यार्थीलाई अभिप्रेरित गर्न र माध्यमिक तहको अन्तिम परीक्षामा सहयोग होस् भन्ने उद्देश्यले ग्यालेक्सी बिजनेस हाजिरी जबाफ प्रतियोगिता आयोजना गर्न लागिएको ग्यालेक्सी मल्टिपल कलेजका प्रमुख जे।डी भट्टले बताए । विद्यालयहरू बिच प्रतिस्पर्धा गराई विद्यार्थीलाई पढाइप्रति आकर्षित गर्न र सकारात्मक प्रतिस्पर्धाको भावना विकास गराउन हरेक वर्ष ग्यालेक्सी बिजनेस हाजिरी जबाफ प्रतियोगिता आयोजना गरिने प्रमुख भट्टले बताए ।

यस वर्ष पहिलो पटक भएकाले धनगढी उपमहानगरपालिका भित्रका विद्यालयलाई मात्र सहभागी गराएकोमा अर्को वर्षबाट कैलाली र कञ्चनपुर का विद्यालयलाई सहभागी गराएर प्रभावकारी रूपमा अगाडी बढाउने योजना रहेको प्रमुख भट्टले जानकारी दिए ।

त्रिभुवन विश्वविद्यालयबाट सम्बन्धन प्राप्त गरी वि।स २०७९ सालमा धनगढी उपमहानगरपालिका वडा नम्बर १ पशुपति टोलमा स्थापना भएको ग्यालेक्सी मल्टिपल कलेजमा व्यवस्थापन संकायको बिबिएस कार्यक्रम सञ्चालन भइरहेको छ । विद्यार्थीलाई शैक्षिक ज्ञानको साथै टेक्निकल सिपहरू सिकाउँदै दक्ष जनशक्ति उत्पादन गर्ने कलेजको उद्देश्य रहेको बताइएको छ ।