धनगढी- कैलालीको धनगढीस्थित शिवनगर ५ मा रहेको चैतन्य पाठशालाद्वारा चैतन्य बाल साहित्य सम्मेलन सम्पन्न भएको छ । मंगलबार बिद्यालयकै प्राङ्गणमा बाल साहित्य सम्मेलन आयोजना गरिएको हो । विद्यालय अभिभावक संघका अध्यक्ष ईश्वर गिरीको सभाध्यक्षमा भएको बाल साहित्य सम्मेलनको प्रमुख अतिथि साहित्यकार डा बद्री शर्मा बिनाडी रहेका थिए ।

चैतन्य बाल साहित्य सम्मेलनको स्वागत मन्तव्य राख्दै प्रधानाध्यापक कटक सिंहले शिक्षासहित संस्कारको सिकाई रहेको चैतन्यले विद्यालय तहबाटै ज्ञानगुनका कुरा उजागर गरिरहेको बताए । विद्यालय तहबाटै बिद्यार्थीहरु विभिन्न रचनात्मक क्रियाकलापसहित यस्ता साहित्य क्षेत्रको माध्यमबाट उनीहरूको सिप कला क्षमता र ज्ञानगुनका कुराको बृद्र्धि विकास हुने बताए । किताबी ज्ञान बाहेक यस्ता रचनात्मक र सृजनशीलताले पनि बिद्यार्थीहरुको बौद्धिकता बढ्ने उनले बिश्वास लिएका छन् ।

यस्तै चैतन्य पाठशालाका सीइओ गणेशप्रसाद जोशीले पाठशालाले २० वर्षपछि काम लाग्ने शैक्षिक गुणस्तरीय शिक्षा दिइरहेको बताएका छन्। विद्यालयमा वेद र विज्ञानलाई सँगसँगै पढाइरहेको र विद्यार्थीहरूलाई अहिलेको समय परिवेश अनुसार आवश्यकता परेको शिक्षा अनुकूल स्मार्ट बोटबाट समेत पठनपाठन गराइरहेको जानकारी दिए । शिक्षा र संस्कारको संगम चैतन्य पाठशाला अझै पनि गुणस्तरीय शिक्षाको गुणस्तरीय शिक्षाको लागि अझै हरपल लागिरहेको उनको भनाइ छ ।

कार्यक्रममा बोल्दै कैलाली बहुमुखी क्याम्पसका सहायक प्राध्यापक गणेश प्रसाद जोशीले बाल साहित्य सम्मेलनले विद्यार्थीको चौतर्फी विकास गर्न सहयोग गरेको भन्दै आयोजकलाई धन्यवाद दिएका छन् । उनले विद्यालयले केवल पठनपाठन मात्रै गरेर नहुने भन्दै यस्ता रचनात्मक र सृजनशीलतालाई जोड दिनुपर्ने बताएका छन् । सहायक प्राध्यापक जोशीले भने, विद्यार्थीले किताबी कुरा घोक्ने, रटाउने, परम्परालाई तोड्नुपर्छ, खेल्ने रमाउने सिक्दै जाने गर्नुपर्ने आवश्यक रहेको बताए ।

कार्यक्रममा बिद्यार्थीहरु आफैले रचना गरेका गीत कविता, गजल लगायतका साहित्यक रचनाहरू सुनाएका थिए । कार्यक्रममा कक्षा ८ मा अध्ययनरत विद्यार्थी जेनी चौधरीले म को हुँ भन्ने रमाइलो र ज्ञान बद्र्धक कविता सुनाएकी थिइन् ।