धनगढी- कैलालीको धनगढीमा एक्सिस विद्याश्रमले सामाजिक उत्तरदायित्व अन्तर्गत विभिन्न कार्यहरू गरेको छ । विद्यालयले समाजसँग हातेमालो गर्दै अगाडि बढ्नुपर्ने भन्दै विभिन्न कार्यक्रमहरू गरेको हो । धनगढी उपमहानगरपालिका–५ हसनुपरमा रहेको एक्सिस विद्याश्रमले ‘विद्यालय सामाजिक उत्तरदायित्व परियोजना’ चलाएको जनाइएको छ। यस परियोजना अन्तर्गत समाजमा विभिन्न कार्यक्रम गरिरहेको विद्यालयको दाबी छ।

एक्सिस विद्याश्रमले विगतदेखि नै हरेक वर्ष रक्तदान गर्दै आइरहेको छ । रक्तदान कार्यक्रम आयोजनाको सम्पूर्ण जिम्मेवारी विद्यालयमा अध्ययनरत विद्यार्थीले नै बहन गर्दै आएका छन्। यस वर्ष पनि विद्यालयले शुक्रवार रक्तदान कार्यक्रमको आयोजना गरेको थियो। रक्तदानबाट विद्यालयले ८५ पिन्ट रगत संकलन गरेर नेपाल रेडक्रस धनगढीलाई हस्तान्तरण गरेको विद्यालयकी प्रधानाध्यापक अनिता पन्तले बताइन्।

रक्तदान महादान’ भन्ने विषयको बोध गराउँदै विद्यार्थीहरूमा समाजसेवाको भावना जगाउने काम समेत भइरहेको उनले बताइन् । उनले बालबालिकामा विद्यालय शिक्षाले नै समाज सेवाको पाठ अनिवार्य सिकाउनुपर्ने बताउँदै रक्तदान लगायत सामाजिक काममा विद्यार्थीलाई लाग्न अभिप्रेरित गरिरहेको उनको भनाइ छ ।