धनगढी- कैलालीको धनगढीमा ‘प्रादेशिक ललितकला प्रदर्शनी २०८०’ सुरु भएको छ । सुदूरपश्चिम प्रज्ञा–प्रतिष्ठान र नेपाल ललितकला प्रज्ञा–प्रतिष्ठानकको सँयुक्त आयेजनामा आजबाट प्रदर्शनी सुरुभएको हो ।
कार्यक्रमको सुदूरपश्चिमका मुख्यमन्त्री कमलबहादुर शाहले उद्घाटन गरेका छन् । उद्घाटन कार्यक्रमा बोल्दै मुख्यमन्त्री शाहले प्रदेश सरकारले आगामी दिनमा कलाकारलाई थप हौसला प्रदान गर्ने बताए । उनले भने ‘यस प्रदर्शनीमा ललितकलासँग जोडिएका कलाकारहरुका सिर्जना देख्न पाइयो । उहाँहरु क्षमता उच्च सम्मानयोग्य छ । यस्ता कलाकारहरुलाई प्रदेश सरकारले सधैँ उच्च सम्मान गर्नेछ ।’
प्रदेश सरकारका गतिविधि कलाकारलाई हौसला प्रदान गर्ने सन्दर्भमा भोलिका दिनमा कलाकारका साथमा रहने उनले बताए । सुदूरपश्चिम प्रदेश सरकारले प्रज्ञा–प्रतिष्ठान ऐन बनाइ रहेको बताउँदै उनले विभिन्न विधासँग जोडिएका कुराहरु ऐनमा समेटेको बताए । उनले भने ‘ऐन सबैले अपनत्व महसुस गर्ने बनोस् भन्ने मेरो चाहाना छ । त्यसका लागि सबैको सुझाव सल्लाहको अपेक्षा गरेका छौँ ।
भौतिक संरचनासँगै साँस्कृतिक कुराको पनि विकासलाई जोडेर लैजाने उदेश्यले दुर्गम क्षेत्रका प्रतिभालाई समेट्न प्रदेशस्तरमा कार्यक्रम गरिएको नेपाल ललितकला प्रज्ञा–प्रतिष्ठानका कुलपति नारदमणि हार्तम्छालीले बताए । उनले ललितकलाको सामाजिक रुपान्तरणमा ललितकलाको अभियानको सिलसिलामा प्रदेशस्तरमा ललितकला प्रदर्शनी गरिएको बताए ।
सुदूरपश्चिम प्रज्ञा–प्रतिष्ठानका उपकुलपति डा.टीएन जोशीले प्रतिष्ठानले सुदूरपश्चिमको कला,साहित्य,संस्कृति,पुरातत्व,इतिहास,दर्शनलाई उजागर गर्न लागेको बताए । प्रादेशिक ललितकला प्रदर्शनी मार्फत यहाँका कुना कन्दरामा लुकेर रहेका कलाकारहरुका प्रतिभा प्रष्फुटन खोजिएको उनको भनाइ छ । आइतबारबाट सुरु भएको ललितकला प्रदर्शनी यही फागुन २४ गतेसम्म सञ्चालन हुने जनाइएको छ ।
