धनगढी- कैलालीमा दुईवटा सडकपुल निर्माण अन्तिम चरणमा पुगेका छन् । पूर्वाधार विकास कार्यालय कैलालीमार्फत निर्माण भइरहेका ती पुलहरुको निर्माण कार्य करिब अन्तिम चरणमा पुगेको हो ।
जिल्लाको घोडाघोडी नगरपालिका–२ चितालपुरस्थित बौराहा खोलामा निर्माणाधिन सडकपुलको ८५ प्रतिशत काम भइसकेको पूर्वाधार विकास कार्यालय कैलालीका सूचना अधिकारी विनोद खड्काले जानकारी दिए । उक्त पुलको स्ल्याप ढलानको काम भइसकेको बताउँदै उनले पुलको छेउछाउमा वाल,ग्याविन लगाउने काम बाँकी रहेको र काम निरन्तर भइरहेको बताए ।
प्रदेश सरकारको रु.७ करोड १९ लाख २९ हजार लागतमा निर्माण हुन लागेको सो पुल २०८० पुस २३ मा निर्माण सम्पन्न गर्ने गरि २०७९ असार २३ गते ठेक्का सम्झौता गरिएको उनले बताए । स्वार कन्स्ट्रक्सन प्रालि अछामसँग सम्झौता भएको कार्यालयले जनाएको छ । सम्झौताको म्यादभित्र काम सम्पन्न नभएपछि २०८० चैत २० गतेसम्म सक्ने गरि सम्झौताको म्याद थपिएको सूचना अधिकारी खड्काको भनाइ छ ।
त्यस्तै घोडाघोडी नगरपालिका–८ तारानगर स्थित सोही बौराहा खोलामा निर्माणाधिन अवस्थामा रहेको खडकपुलको काम ७५ प्रतिशत सम्पन्न भइसकेको पूर्वाधार विकास कार्यालयले जनाएको छ ।
रु. ७ करोड ६४ लाख ५० हजारमा बन्दै गरेको सो पुलको हाल स्ल्याप ढलानको तयारी भइरहेको सूचना अधिकारी खड्काले बताए । उनका अनुसार उक्त पुल २०८० फागुन मसान्तसम्म निर्माण सम्पन्न गर्ने गरि २०७९ भदौ १८ गते ध्रुवतारा एनएस निर्माण कम्पनी अछामसँग सम्झौता भएको थियोे । दुबै पुलका निर्माण कम्पनीलाई करिब ८० प्रतिशत भुक्तानी समेत भइसकेको उनले बताए ।
निर्माणाधिन दुबै मोटरेवल पुलको काम चालु आवमै सम्पन्न गर्ने कार्यालयले लक्ष्य लिएको पूर्वाधार विकास कार्यालयका प्रमुख रामचन्द्र खत्रीले बताए । उनले भने ‘काम पनि तिब्रगतिमा भइरहेको छ । चालु आवमै निर्माण सम्पन्न गर्ने लक्ष्य कार्यालयको छ । दुबै पुल चालु आवमै सम्पन्न हुने कार्यालयको विश्वास छ ।’
