धनगढी- सुदूरपश्चिम प्रदेशका निवर्तमान उद्योग,पर्यटन,वन तथा वातावरण मन्त्री रमेहसिंह धामीले मन्त्रालयको नेतृत्वमा रहँदा विभिन्न अभावका बीच छोटो समयमा जनतामा सन्देश पैदा हुने गरि महत्वपूर्ण काम गरिएको बताएका छ्न ।
बुधवार पत्रकार भेटघाट कार्यक्रममा उनले आफ्नो बुद्धि, विवेक र दक्षताले भ्याएसम्म इमान्दारितापूर्वक काम गर्ने प्रयास गरेको बताए । उनले भने ‘बजेट निर्माणको अन्तिम समयमा मन्त्रालयको नेतृत्व सम्हालेको थिए । बजेट कार्यान्वयनको बेला जिम्मेवारीबाट विदा हुन लाग्दा जनअपेक्षाअनुसार काम भएको नदेखिएपनि सीमित स्रोतसाधन, कर्मचारीको अभाव, आवश्यक कानुनी र नीतिगत समस्या र अनुभवको कमीका वावजुद छोटो समयमा केही सकरात्मक काम भएका छन् ।’
उनले भने ‘सेवा प्रवाहलाई प्रभावकारी बनाउने, फजुल खर्चलाई निरुत्साहित,सुशासन कायम हुने गरी नीति तथा कार्यक्रम तय गरिनुका साथै मन्त्रालयको क्षेत्राधिकारभित्रका योजनामा मात्र वजेट विनियोजन गर्ने पद्धति बसाउने प्रयास गरिएको छ ।’
लामो समयदेखि वन क्षेत्रमा अवरुद्ध रहेका कामकारवाही सूचारु गरी प्रदेशभित्र वनमा आधारित रोजगारी सिर्जना गर्ने, वन पैदावारसँग सम्बन्धित उद्योग, व्यवसायलाई चलायमान बनाउने काम आफ्नो नौ महिने कार्यकालमा भएको उनले बताए ।
वैज्ञानिक वन कार्यक्रम खारेजपछिको शून्यतालाई अन्त्य गर्दै वन व्यवस्थापन कार्यलाई निरन्तरता,लामो समयदेखि रोकिएको उद्योग सम्बन्धि कामलाई अगाडि बढाउने, पर्यटन क्षेत्रका कामलाई चुस्त पार्ने लगायत नीतिगत सुधारको प्रयास गरिएको उनले दाबी गरे । केन्द्रीय सत्ता समीकरण फेरिएसँग मंगलबार सुदूरपश्चिम प्रदेशका मुख्यमन्त्री कमलबहादुर शाहले माओवादीबाट मन्त्री बनेका धामी,सामाजिक विकास मन्त्री झपट साउद र उद्योग पर्यटन,वन,तथा वातावरण राज्यमन्त्री गीतादेवी माललाई जिम्मेवारी मुक्त गरेका थिए ।
