काठमाडौं- नवनियुक्त उद्योग बाणिज्य तथा आपूर्ति मन्त्री दामोदर भण्डारीले सकारात्मक रिजल्ट आउने गरि काम गर्न मन्त्रालयका कर्मचारीहरुलाई निर्देशन दिएका छन्। बुधबार सांझ राष्ट्रपति कार्यालयबाट शपथग्रहण पश्चात् मन्त्रालयमा आयोजित परिचायात्मक कार्यक्रममा उनले उक्त निर्देशन दिएका हुन्।
‘म फेरि अर्को पटक झण्डै एकबर्षपछि यो जिम्मेवारीमा फर्किएको छु। मैले पाएको यो जिम्मेवारीलाई सहि ढंगले काममा प्रयोग गर्नेछु । हाम्रा अघि धेरै चुनौतीहरु छन्,ती चुनौतिलाई संभावनामा बदल्ने हामी सबैको दायित्व हो। हामी सबैले आम जनतामा रहेको निरासालाई आशामा बदल्नु छ त्यसैले सबैको साथ सहयोगको अपेक्षा गर्दछु।’मन्त्री भण्डारीले भने ।
उनले दृढ इच्छाशक्तिका साथ आफ्नो सामर्थ्यलाई प्रयोग गरे हामी जनताको निरासालाई आशामा बदल्न सक्ने अठौटपनि व्यक्त गरे। मन्त्री भण्डारीले काम गर्न नसक्ने छुट कसैलाई नभएको उल्लेख गरे। हामी पन्छिन खोज्छौ भने त्यो दायित्व पूरा हुन सक्दैन। आजबाट कुनै बिचारका कारण कसैलाई विभेद हुदैन तर काम गर्न तत्परता भएन भने ती व्यक्ति जुनसुकै पदमा भएपनि आफ्नो मार्ग प्रशस्त गर्नुपर्छ।,’उनले भने
मन्त्री भण्डारीले सरकारको नयाँ संकल्प पूरा गर्नुपर्ने सबैको दायित्व भएको उल्लेख गर्नुभयो । उहाँले मन्त्रालय भित्र कामको रिजल्ट दिन सक्यौं कि सकेनौ त्यसैको आधारमा सबैको मुल्यांकन हुने पनि बताए । ‘विगतमा के भयो त्यो थाहा छैन तर भोलीबाट निश्चित समयमा निश्चित जिम्मेवारी दिइने छ, त्यो कार्यभार सबैले पूरा गर्नुपर्छ। उद्योग बाणिज्य तथा आपूर्ति मन्त्रालयमा जे जति ब्यवस्थापकिय पक्ष छन, ती राम्रा कामहरुलाई निरंतरता दिइनेछ। रोकिएका कामहरुलाई अगाडि बढाइनेछ।,’उनले भने ।
मन्त्री भण्डारीले लगानी सम्मेलनको तयारीलाई अझ परिस्कृत बनाउने उद्घोष गरे उनले बिहिबारबाट मन्त्रालयमा निश्चित समयमा निश्चित रिजल्ट आउनेगरी काममा लाग्न सबै मातहतका कर्मचारीहरुलाई निर्देशनसमेत गरे। उक्त परिचयात्मक कार्यक्रममा मन्त्रालयका सचिवहरु,महाशाखा प्रमुखहरु,विभागीय प्रमुखहरुका साथै अन्य मातहतका कर्मचारीहरुको उपस्थिति रहेको थियो।
