धनगढी- नेपाल पूर्व प्रहरी संगठन सुदूरपश्चिमले सुदूरपश्चिम प्रदेश प्रहरी कार्यालयलाई ज्ञापनपत्र बुझाएको छ । पूर्व प्रहरीहरूको ६० प्रतिशत भन्दा बढी कोषमा योगदान हुँदा हुँदै पनि नेपाल पूर्व प्रहरी संगठनले आफ्नो वर्ग माथि प्रहरी कल्याण कोष व्यवस्थापन सञ्चालक समितिले आफूहरूमाथि घोर अन्याय गरेको ठहर गर्दै देश व्यापी रूपमा ज्ञापन पत्र बुझाएको र सोही अनुरूप प्रदेश प्रहरी लाई पनि ज्ञापन बुझाइएको नेपाल पूर्व प्रहरी संगठन सुदूरपश्चिम प्रदेश अध्यक्ष उतमबहादुर सिंहले बताए ।

प्रहरी कल्याण कोषको न्यायोचित वितरण गर भन्ने नाराका साथ प्रहरी कल्याण कोष व्यवस्थापनको विरोधमा देशव्यापी आन्दोलन र विरोध कार्यक्रमहरू अघि बढाउने भएको छ । हाम्रा मागहरू ज्ञापन पत्र बुझाएको ३५ दिन भित्र पुरा नगरे उग्र रूपमा आउन बाध्य हुने समेत ज्ञापन पत्र मार्फत चेतावनी दिएका छन् ।

आजै बिहान कैलाली संगठनले पनि जिल्ला प्रहरी कार्यालयका प्रहरी प्रमुखलाई ज्ञापन पत्र बुझाएका थिए ।नेपाल पूर्व प्रहरी संगठनले ६ बुँदे माग राख्दै आज देशब्यापीरुपमा देशभरका जिल्ला प्रहरी प्रमुखलाई ज्ञापन पत्र बझाएका हुन् ।

यस्ता छन् ६ बुँदे मागहरू :–

१. आय व्ययको हिसाब किताब नेपाल पूर्व प्रहरी संगठनका पदाधिकारी तथा स्वतन्त्र चार्टर्ड एकाउन्टेन्ट वा अडिट फर्म समेत सहभागी गराई एक छानबिन समिति गठन गरियोस् ।
२. नेपाल प्रहरी कल्याण कोषबाट ४० प्रतिशत पूर्व प्रहरीका लागि खर्च गरिनु पर्छ ।
३. प्रहरी कल्याण सञ्चालक समितिमा ४० प्रतिशत पूर्व प्रहरीबाट हुने व्यवस्था गरियोस् ।
४. व्यापारिक कामहरू पूर्व प्रहरी संगठनलाई दिइयोस् , प्रहरी संगठनले व्यापार नगरोस् ।
५. पूर्व प्रहरी कल्याण समन्वय शाखा स्थापना गरियोस् ।
६. प्रहरीका अमर सहिद परिवारका सन्ततीका लागि १० प्रतिशत र प्रहरी परिचर देखि ब.प्र.ना.नि. दर्जा सम्मका पूर्व प्रहरीहरूका सन्ततिहरूका लागि ५ प्रतिशत नयाँ भर्ना कोटा प्रदान गर्ने व्यवस्था गरियोस् ।