धनगढी- कैलालीको धनगढीमा पत्रकार मनऋषि धितालले लेखेका जनयुद्धकालीन डायरीमाथि संवाद गरिएको छ । शनिबार धितालले लेखेका जनयुद्धकालीन डायरीमा समावेश गुफाप्रेसको चिठी,जेलयात्रा,बेनीयात्रा,आधारयात्रा,राजमार्गयात्रा,पिलीयात्रा र गण्डकयात्रा पुस्तकमाथि संवाद गरिएको हो ।
कार्यक्रममा पत्रकार धिताले लेखेका पुस्तकका सम्पादक राजकुमार कुँवरले प्रस्तुतिकरण राखेका थिए भने सहभागीले आ–आफ्ना धारणा राखेका थिए । प्रस्तुतिकरण राख्दै सम्पादक कुँवरले लेखकले युद्धकालिन समयमा देखेका,सुनेका र भोगेका कुराहरु पुस्तकमा समेटेको बताए । उनले तत्कालीन अवस्थामा राजनैतिक दलको अवस्था,प्रेस स्वतन्त्रताको अवस्था,आन्दोलनमा भएका गतिविधिलगायतका बिषय पुस्तकमा समेटिएको उनले बताए । त्यस्तै लेखक जेल जीवनको भोगाइ,जनयुद्धको जीवित इतिहास,सत्य,तथ्य र सुन्दर पक्ष पुस्तकमा प्रतुत गरेको उनले बताए । उनले भने ‘जनयुद्धको समयमा घटेका वास्तविक घटनाका बारेमा पुस्तकहरुमा प्रस्तुत गरिएको छ ।’
पुस्तकमाथि धारणा राख्दै संविधानसभा सदस्य हरि श्रीपाइलीले युद्धकालीन डायरीमा समावेश पुस्तकहरु सबै ऐतिहासिक र महत्वपूर्ण भएको बताए । उनले भने ‘यी पुस्तकहरु राजनैतिक दलका लागि अध्ययन सामग्री बन्ने सक्नेछन् । नयाँ पुस्ताका लागि त झन महत्वपूर्ण बन्ने छन् ।’
नेकपा(माओवादी केन्द्र)की नेतृ मञ्जु बमले यी पुस्तकहरु जानकारी मुलक सामग्री बन्ने बताइन् । उनले भनिन् ‘युद्धको भोगाई,द्धन्द्ध सिर्जनादेखि समाधानसम्मको यात्रा समेटिका पुस्तक सिंगो इतिहास नै हुन ।
संवादमा सहभागी बरिष्ठ मनमोहन स्वारले युद्धको समग्र कुरा समेटिएका पुस्तक त्योबेलाको जीवन्त साक्षी भएको बताए । त्यस्तै बरिष्ठ पत्रकार उमीद बागचन्दले जनयुद्धकालीन डायरीमा समावेश पुस्तकहरु दस्ताबजेकरण र इतिहास भएको बताए । त्यस्तै पत्रकार वीरेन्द्र रावलले पुस्तकमार्फत संघर्षका पाटाहरु एवं जनयुद्धको सिलसिलेवार प्रस्तुति गरिएको बताए । पत्रकार दीर्घराज उपाध्यायले यी पुस्तकहरु युद्धलाई विर्सिएर सत्तामा जाने नेताहरुका लागि गीता बन्ने बताए । पत्रकार दिलबहादुर छत्यालले त्यो बेलाको अवस्था नबुझेकालाई जनयुद्धकालिन पुस्तक जानकारीमुलक सामग्री बन्ने बताए ।
बरिष्ठ साहित्यकार पदमराज जोशीले युद्धकालीन डायरीमा समावेश पुस्तकहरुले तत्कालीन समयको नेपालको इतिहास जान्न चाहनेका लागि पठनयोग्य सामग्री बन्ने बताए । लेखक धितालले तत्कालीन समयमा आफूले देखेको,भोगेको,सुनेको कुराहरु पुस्तकमा समेटिएको बताए । ‘त्यो बेला समाजभित्र भएका हरेक गतिविधि पुस्तकमा समेटेको छु ।’ उनले भने ‘जनयुद्धको समयमा भएका कमी कमजोरी पनि यसमा समावेश छन् । यो इतिहासको दस्ताबेज हो ।’
