धनगढी- सुदूरपश्चिम प्रदेशका भौतिक पूर्वाधार विकास मन्त्री प्रकाशबहादुर देउवाले खेलहरूको उचित संरक्षण र सम्वद्र्धन गर्न आवश्यक नीति बजेट र योजना तर्जुमा गर्ने बताएका छन् । धनगढीको फाप्ला क्रिकेट मैदानमा सोमबार कैलाली प्रिमियर लिग टी २० अन्तरपालिका स्तरीय क्रिकेट प्रतियोगिता २०८० को उद्घाटन गदै मन्त्री देउवाले यस्तो बताएका हुन् ।
उनले खेलकुद शिक्षालाई विद्यालय शिक्षाको एक अभिन्न अंगका रूपमा पाठ्यक्रममा नै समेटेर अगाडी बढ्ने नीति निर्माण गर्ने बताए ।
त्यसका लागि खेलकुद विकासको संवर्द्धन र प्रवर्द्धनका लागि प्रदेश सरकार निरन्तर लागि रहेको मन्त्री देउवाले बताए ।
प्रदेश सरकारले खेलकुद पूर्वाधार निर्माण र व्यवसायिकरुपमा वर्ष भरी नै खेलाडीले खेल खेल्ने वातावरण सिर्जना गर्नका लागि स्थानीय खेलमैदान, बहुउद्देश्यीय कभर्डहलको पूर्वाधार निर्माण प्राथमिकता राखेको मन्त्री देउवाको भनाइ छ ।
‘यस प्रतियोगिताले सुदूरपश्चिम प्रदेशमा मोफसलमा सञ्चालन भइरहेका क्रिकेट क्लब र क्रिकेट क्लबका खेलाडीलाई आम सवल, सक्षम, र व्यवसायीक बनाउने, खेलाडीहरूको खेल खेल्ने व्यावसायिकतामा निखार ल्याउने तथा यहाँको खेलप्रर्यटनमा समेत मदत पुग्ने मैले विश्वास लिएको छु,’ मन्त्री देउवा ।
सुदूरपश्चिममा क्रिकेटको सम्भावनालाई उजागर गर्न काँग्रेसका सभापति शेरबहादुर देउवाको नेतृत्वको सरकारले फाप्ला अन्तर्राष्ट्रिय क्रिकेट मैदान बनाउन फाप्ला अन्तर्राष्ट्रिय क्रिकेट मैदान तथा खेल ग्राम पूर्वाधार निर्माण विकास समिति निर्माण गरी कार्य अगाडि बढाएको मन्त्री देउवाले बताए ।
अहिले उक्त समितिले डिपिआर निर्माण गरेर आगामी वैशाखमा हुने संघिय सरकारको लगानी तथा विकास सम्मेलनमा आयोजनको रूपमा प्रस्तुत गरिने उनको भनाइ छ । ‘यो मैदानमा अन्तर्राष्ट्रिय क्रिकेट मैदान निर्माण भएमा यस क्षेत्रको विकास र समृद्धि तथा क्रिकेट खेलको विकासमा टेवा पुग्नेछ,’ मन्त्री देउवा।
