कञ्चनपुर । कञ्चनपुरको पूर्वाधार विकास कार्यालयका कर्मचारी बस्नका लागि निर्माण गरिएको आवास महिनौ हुँदा पनि उपयोगमा आउन सकेको छैन । सो आवासमा महिनौ देखि ताला झुण्याइएको छ भने उता कर्मचारी भने भाडा तिरेर अर्कै आवासमा बसेका छन् । संघीयता आएपछि प्रदेश भरि पूर्वाधार विकासका काम गर्न जिल्ला समन्वय समितिका भवन प्रयोगमा आए । कञ्चनपुर जिल्लामा पनि जिल्ला समन्वय समितिसँगै रहेको प्राविधिक कार्यालयलाई पूर्वाधार विकास कार्यालयका रूपमा रूपान्तरण गरिएको थियो ।
उक्त कार्यालय पूरानो जीर्ण भएको र सानो भएकाले नयाँ बनाउनु उपयुक्त देखिएपछि कार्यालय बनाउन सुरु गरियोे। यो सँगै कर्मचारीहरूलाई बस्नका लागि आवास समेत निर्माण गर्न सुरु गरिएको थियो। कार्यालय र आवास केही महिना पहिला नै सम्पन्न भइसकेको अवस्था छ। आवास भने भाडाकै घरमा चलिरहेको छ । यो भनेको राज्यश्रोतको चरम दुरुपयोग भएको स्थानीय बताउँछन् ।
भीमदत्त नगरपालिकास्थित निजी घर भाडामा लिएर मासिक रुपमा भाडा तिरेर आवास चलिरहेको छ । यसरी मासिक रूपमा आवासलाई पैसा तिरिरहँदा सरकारले बनाएको सरकारी आवास भने ताला लगाएर राखिएको छ।
सरकारले करोडौं लगानी लगाएर निर्माण सम्पन्न गरेको आवास अलपत्र पारेर निजी घरमा भाडा तिरिरहनु राज्य स्रोतको चरम दुरुपयोग भएको स्थानीय बताउँछन् । कार्यालयका प्रमुख एवं इन्जिनियर योगेन्द्र अधिकारीले फनिसिङ हुन बाँकी रहेकाले समय लागेको बताए । हेण्डओभर पनि भई सकेको र यही महिनाको अन्त तिर पूजापाठ गरेर सर्ने तयारी भइरहेको उनले बताए ।
