धनगढी । कैलाली भन्सार कार्यालयका प्रमुख अनन्त तिमिल्सिनालाई कुटपिट गरेको घटनामा धनगढी उपमहानगरपालिकाले नगर प्रहरी निरीक्षक लक्ष्मणसिंह धामीलाई २४ घण्टे स्पष्टिकरण सोधेको छ ।
प्रमुख प्रशासकीय अधिकृत नरेन्द्रबहादुर खातीले सो घटनाका सम्बन्धमा स्पष्टिकरण पेस गर्न आइतबार पत्र पठाएका हुन् । शनिबार राति भन्सार कार्यालयका प्रमुखलाई धनगढी उपमहानगरपालिकाका नगर प्रहरीले कुटपिट गरेको भिडियो बाहिरिएको छ ।
उपमहानगरले सामाजिक सञ्जाल र विभिन्न मिडियामा नगरप्रहरी निरीक्षक धामीसँग जोडिएर समाचार आएकोले सो सम्बन्धमा के कसो भएको हो ? उक्त घटनाका सम्बन्धमा पछिसम्म फरक नपर्ने गरी सत्यतथ्य व्यहोराको स्पष्टिकरण पत्र प्राप्त भएको मितिले २४ घण्टाभित्र स्पष्ट उचित कारण सहित पेस गर्न भनेको छ ।
समयमा स्पष्टिकरण नआएमा धनगढी उपमहानगरपालिकाको नगर प्रहरी (व्यवस्थापन) कार्यविधी (संशोधन समेत) २०७९ तथा अन्य प्रचलित कानुन अनुसार कारबाही हुने पत्रमा भनिएको छ ।
