धनगढी । कैलालीको धनगढीस्थित चैतन्य पाठशालाले आज प्राकृतिक जीवनशैली विषयक अभिभावक उत्प्रेरणा कार्यक्रम गरेको छ । विश्व संगीत दिवस र विश्व योग दिवसको सन्दर्भमा पाठशालाले सो कार्यक्रम गरेको हो ।
प्राकृतिक जीवनशैलीलाई प्रवर्द्धन गर्ने उद्देश्यले आयोजना गरिएको उक्त कार्यक्रममा अभिभावक, विद्यार्थी तथा शिक्षाविद्हरूको उल्लेखनीय उपस्थिति रहेको थियो। कार्यक्रममा योग, ध्यान, स्वस्थ जीवनशैली, सकारात्मक सोच तथा संस्कारबारे गहन प्रस्तुति र अनुभव साथै विभिन्न विषयहरूमा विशेष सत्रहरू सञ्चालन गरिएका थिए।
कार्यक्रममा लोक तथा दोहोरी गायक बद्री पंगेनीको विशेष प्रस्तुति रहेको थियो । योग, ध्यान र प्राकृतिक जीवनशैलीको अभ्यास बारे आयुर्वेदिक चिकित्सक डा.प्रीति ज्ञवाली र पतञ्जली योग समिति सुदूरपश्चिम प्रदेशका वैद्य हेमन्तराज ओझा प्रमुख वक्ताका रूपमा उपस्थित थिए। उनीहरूले सङ्गीत, आयुर्वेद र योगमार्फत आत्मसंवेदनशीलता, सन्तुलित जीवनशैली र संस्कारको महत्त्वबारे जानकारी दिएका थिए ।
कार्यक्रममा बोल्दै चैतन्य पाठशालाका अध्यक्ष गणेशप्रसाद जोशीले वर्तमान समयमा संस्कार सहितको शिक्षा अपरिहार्य रहेको र चैतन्य पाठशालाले समय सुहाउँदो शिक्षा प्रदान गर्ने अभ्यास गरिरहेको बताए । उनले यस्ता कार्यक्रमहरूले बालबालिकाको समग्र विकासमा सकारात्मक प्रभाव पार्ने विश्वास लिएको बताए । चैतन्य पाठशालाका अभिभावक विद्यार्थी सङ्घका अध्यक्ष ईश्वर गिरी अध्यक्षतामा भएको थियो ।
