धनगढी । कैलालीको धनगढी उपमहानगरपालिकाको आगामी आर्थिक वर्ष २०८२/०८३ को बजेट पारित भएको छ। शनिबार बसेको नगरसभाबाट २ अर्ब ५६ करोड चार लाख ६६ हजारको बजेट पारित भएको हो।
उपमहानगरले चालु आर्थिक वर्षको बजेट भन्दा रु ३७ करोड ६२ लाख ३३ हजार सात सय ८० बजेट वृद्धि गरेको जनाएको छ । उपमहानगरले चालुतर्फ एक अर्ब ३८ करोड २६ लाख ५१ हजार छ सय ४० र पुजीगततर्फ एक अर्ब १८ करोड २९ लाख ३५ हजार २ सय ९२ रुपैयाँ बजेट पारित गरेको छ। उपमहानगरको कुल बजेटमध्ये चालुतर्फ ५३ दशमलव ८ प्रतिशत र पुजीगततर्फ ४६ दशमलव २ प्रतिशत बजेट रहेको छ।
धनगढी उपमहानगरपालिकाको आन्तरिक आय ५४ करोड ७९ लाख ६७ हजार एक सय ११ रुपैयाँ रहेको छ । राजस्व बाँडफाँडबाट ५७ करोड ६० लाख ६२ हजार एक सय ४३, नेपाल सरकारबाट वित्तीय हस्तान्तरण ९९ करोड नौ लाख, प्रदेश सरकारबाट वित्तीय हस्तान्तरण ११ करोड २२लाख ४१ हजार र मौज्दात ३३ करोड ३२ लाख ९५ हजार सात सय ४६ रुपैयाँ रहेको छ।
उपमहानगरपालिको चालु आवमा २ अर्ब १८ करोड ४२ लाख ३२ हजार २ सय २० रुपैयाँ बजेट रहेको छ ।
