काठमाडौं । देशका विभिन्न ठाउँमा छुट्टाछुट्टै दुर्घटनामा परि ९ जनाको मृत्यु भएको छ । काठमाडौंको चन्द्रागिरी नगरपालिका–१५ ढुङगेअड्डास्थित सडकमा बा.प्र.०२–०४९ प ४९५७ नम्बरको मोटरसाइकल आइतबार राति दुर्घटना हुँदा चालक हुम्ला घर भएका २२ वर्षीय धिरेन्द्र भियालको मृत्यु भएको छ । दुर्घटनामा गम्भीर घाइते भएका उनको शहिद मेमोरियल हस्पिटलमा उपचारको क्रममा मृत्यु भएको हो ।
उक्त मोटरसाइकल ना.६ ख ८६७४ नम्बरको ट्रक र बा.६३ प २०७७ नम्बरको मोटरसाइकलसँग एकआपसमा ठक्कर खाई दुर्घटना भएको थियो । साथै दुर्घटनामा घाइते भएका बा.६३ प २०७७ नम्बरको मोटरसाइकल चालकको शहिद मेमोरियल हस्पिटलमा उपचार भइरहेको छ । ट्रक चालकलाई प्रहरीले नियन्त्रणमा लिएको छ ।
इलामको रोङ गाउँपालिका–३ पाथले डाँडास्थित सडकमा प्रदेश १–०१–००१ ख ४५४७ नम्बरको ट्रकले बा ८९ प २२६६ नम्बरको मोटरसाइकललाई आइतबार दिउँसो ठक्कर दिँदा मोटरसाइकल चालक बझाङ वित्थडचिर गाउँपालिका बस्ने २६ वर्षीय मदनबहादुर बोहरा र मोटरसाइकलमा सवार जाजरकोट छेडागाडा नगरपालिका–८ बस्ने २३ वर्षीया सिर्जना गिरीको मृत्यु भएको छ । दुर्घटनामा गम्भीर घाइते भएका उनीहरूको बिएण्डसि अस्पताल बिर्तामोड झापामा उपचारको क्रममा मृत्यु भएको हो । ट्रक चालकलाई प्रहरीले नियन्त्रणमा लिएको छ ।
धादिङको गजुरी गाउँपालिका–६ स्थित सडकमा बा ७० प ३२९७ नम्बरको मोटरसाइकल र बा.प्र ३–०२–३७ प ७६९२ नम्बरको मोटरसाइकल एकआपसमा ठक्कर खाई आइतबार दिउँसो दुर्घटना हुँदा बा ७० प ३२९७ नम्बरको मोटरसाइकल चालक तनहुँ घर भएका ५७ वर्षीय रामचन्द्र राना भाटको मृत्यु भएको छ । दुर्घटनामा गम्भीर घाइते भएका उनको ट्रमा सेन्टर काठमाडौंमा उपचारको क्रममा मृत्यु भएको हो । प्रहरीले बा.प्र ३–०२–३७ प ७६९२ नम्बरको मोटरसाइकल चालकलाई नियन्त्रणमा लिएको छ ।
यसैगरी धादिङकै गजुरी गाउँपालिका–२ फुर्केखोलास्थित सडकमा धादिङवेशीबाट काठमाडौंतर्फ जाँदै गरेको बा ४ ख ७५१ नम्बरको बसको ठक्करबाट सोही बसका सहचालक धादिङ निलकण्ठ नगरपालिका–२ बस्ने १८ वर्षीय समर्पण रिजालको मृत्यु भएको छ । आइतबार साँझ बस ब्याक गर्ने क्रममा ठक्कर दिँदा गम्भीर घाइते भएका उनको पाटन स्वास्थ्य विज्ञान प्रतिष्ठान ललितपुरमा उपचारको क्रममा सोमबार बिहान मृत्यु भएको हो । बस चालकलाई प्रहरीले नियन्त्रणमा लिएको छ ।
चितवनको राप्ती नगरपालिका–१ लोथरस्थित सडकमा हाल नम्बर नखुलेको सवारी साधनको ठक्करबाट पैदलयात्री रामेछाप घर भएका ४० वर्षीय हरिबहादुर खड्काको सोमबार बिहान मृत्यु भएको छ । ठक्करबाट गम्भीर घाइते भएका उनको सरकारी अस्पताल भरतपुरमा उपचारको क्रममा मृत्यु भएको हो । हाल फरार सवारी साधन र चालकको प्रहरीले खोजी गरिरहेको जनाइएको छ ।
मुगुको खत्याड गाउँपालिका–४ स्थित सडकमा माँझचौरदेखि जिउँगातर्फ जाँदै गरेको ज १ त ५११२ नम्बरको ट्याक्टर सडकबाट करिब ७ सय मिटर तल खसेर आइतबार राति दुर्घटना हुँदा ट्याक्टरमा सवार सोही ठाउँ बस्ने ५२ वर्षीया सारदा थापाको घटनास्थलमै मृत्यु भएको छ । साथै दुर्घटनामा घाइते भएका ट्याक्टर चालक समेत ७ जनाको कर्णाली स्वास्थ्य विज्ञान प्रतिष्ठान जुम्लामा उपचार भइरहेको छ ।
धनुषाको विदेह नगरपालिका(५ स्थित सडकमा जनकपुरबाट कमलातर्फ जाँदै गरेको अनटेष्ट लेखिएको मोटरसाइकल सोमबार बिहान दुर्घटना हुँदा मोटरसाइकलमा सवार २ जनाको मृत्यु भएको छ । दुर्घटनामा मोटरसाइकलमा सवार शहिदनगर नगरपालिका–८ नाथपट्टी बस्ने ३० वर्षीय अजय मण्डलको घटनास्थलमै र गम्भीर घाइते भएका मोटरसाइकलमा सवार शहिदनगर नगरपालिका–८ विषरभोरा बस्ने २० वर्षीय अमितकुमार यादवको प्रादेशिक अस्पताल जनकपुरमा उपचारको क्रममा मृत्यु भएको हो । साथै दुर्घटनामा घाइते भएका मोटरसाइकलमा सवार १ जनाको रामजानकी अस्पताल जनकपुरमा उपचार भइरहेको प्रहरीले जनाएको छ ।
