धनगढी । कैलालीको चुरे गाउँपालिकले धामी झाँक्री,स्वयंसेविका र स्वास्थ्य सरोकारवाला बीच न्यायमा पहुँच विषयक अन्तरक्रिया कार्यक्रम गरेको छ ।
बिहीबार पालिको न्यायिक समितिले न्यायमा पहुँच विषयक अन्तरक्रिया कार्यक्रम गरेको हो । अन्तरक्रिया कार्यक्रममा बोल्दै गाउँपालिका अध्यक्ष चक्रबहादुर बोगटीले स्वयंसेविकाहरुले पालकालाई ठूलो गुन लगाएको बताए ।
उनले स्वयंसेविका सेवानिवृत हुँदा ५० हजार बराबरको सम्मान गाउँपालिकाले गर्ने बताए । उनले भने ‘तपाइहरुले चुरेलाई ठूलो गनु लगाउनुभएको छ । चुरेको स्वास्थ्यको जिम्मा तपाइहरुको हो । तपाइहरु ६० वर्ष पुगेर घर जाँदा ५० हजार बराबरको सम्मान गर्छौँ ।’
कार्यक्रमका प्रशिक्षक अधिवक्ता तेजप्रसाद उपाध्यायले धामी,झाँक्री,स्वयंसेविका सबैको काम सहयोग गर्ने भावना भएको बताउँदै सहयोग गर्दा सीमा नाघ्न नहुने बताए ।
उनले भने ‘कानुन भनेको सुरक्षा हो । धामी,झाँक्री,स्वयंसेविका सबैमा सहयोग गरौ भन्ने भावना हुन्छ । सहयोग गर्ने नाममा आफ्नो दायरा नाघ्यौँ भने कानुन आकर्षित हुन्छ । यसमा ध्यान दिनुपर्छ ।’
