काठमाडौँ । नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले माओवादीकै कतिपय नेताहरूले संसद् अवरोध खुलाउन गरेको सहमतिलाई नबुझी प्रतिक्रिया दिएको बताएका छन् ।
बिहीबार पार्टी निकट अखिल नेपाल ट्रेड युनियन महासङ्घको केन्द्रीय समितिको पूर्ण बैठकलाई सम्बोधन गर्दै अध्यक्ष प्रचण्डले यस्तो बताएका हुन् ।
विद्यालय ऐन, निजामती, नागरिकता लगायतका विधेयकहरू पास गर्नुपर्ने बाध्यताका कारण सदन खुलाउन पहल गरेको प्रचण्डको भनाइ छ । ‘तर हाम्रा धेरै साथीले बुझेनन् मलाई दुःख छ’, प्रचण्डले भने, ‘सरकारको नेतृत्व सदन नचलोस् भन्ने चाहेको हामीले बुझ्यौँ । अहिले पनि त्यहीँ छ । यो नचल्दिए हुन्थ्यो भन्ने छ । सदन भङ्ग भइदिएदेखि अध्यादेशबाट सबै गर्ने । चाहे बजेट होस् चाहे अन्य ऐनको कुरा होस् ।’
उनले त्यही कुरा बुझेर आफूले कदम चालेको बताए । ‘अर्कोतिर सत्तामा भएकाहरूको बिचमा जे जति दुरी अन्तर के के छ के हो भनेर बुझ्नुपर्ने आवश्यकता पनि छ । त्यही परिस्थितिमा हामीले केही कदम चालेका छौँ ढिलो छिटो परिणाम निक्लेकै छ,निक्लन्छ’, प्रचण्डले भने ।
एकथरी मानिसले जानिबुझी गलत प्रचार गरेर लिडरसिपलाई कसरी घेराबन्दी गर्ने भन्नेमा लागेको भन्दै त्यसबारे मजदुर वर्गले बुझिदिनुपर्ने उनले बताए ।
